Prime Minister Narendra Modi chuan cooking gas cylinder man chu Rs 100 a tihhniam a nih tur thu International Women’s Day pualin a puang a.
Eirawngbawlna gas man tihhniam hian sum lama chhungkaw nuai tel harsatna a chhawk zangkhai dawn a, a bik takin kan Nari Shakti ten an hlawkpui ang, tiin Prime Minister chuan a sawi.
“Cooking gas man tlawm zawka kan siam hian chhungkuate kan thlawp tihna a ni a, environment tha zawk kan siam dawn a ni. Hei hi hmeichhiate tihchak kan tumna leh an tana nun tihawlsam zawk nana kan hmalakna kal zel a ni” tiin Modi chuan a sawi.
LPG cylinder man tihhniam a nih hnuah Delhi ah chuan a hmaa Rs 903 ni thin khan Rs 803 ah a tlathla ang a, Mumbai-ah Rs 902.5 ni thin chu Rs 802.5 ah a tla thla ang a, Kolkata-ah Rs 929 ni thin chu Rs 829 ah tla thla in Chennai-ah pawh Rs 918.5 ni thin chu Rs 818.5 ah a tlahniam dawn a ni.
Hei bakah hian sorkar chuan March 7, 2024 khan Ujjwala Yojana scheme hnuaiah April 1 atangin hmeichhe rethei te hnena LPG cylinder subsidy a pek chu Rs 300 in a tipung bawk.
Sorkar chuan nikum October thla khan LPG subsidy chu 14.2-kg cylinder zelah Rs 200 ni thin chu rs 300 ah a tisang a. Cylinder subsidy pakhat zela Rs 300 a tihsan hian chungkua 10 crore velin an chhawr tura ngaih niin sorkar sum sen tur erawh Rs 12,000 crore vel ani dawn a ni.
PM Modi chuan International Women’s Day ah hmeichhia te chu chibai a buk thu sawiin, “Kan Nari Shakti te field hrang hranga an hlawhtlinna chakna, huaisenna leh chhelnaah zahna chibai ka buk a ni. Kan sorkar chuan hmeichhia te chu zirna, entrepreneurship, agriculture, technology leh thil dang dangah thlawpa tihchak zel a tum a ni,” tiin Prime Minister chuan a sawi bawk.
Pre-poll promises
India inthlanpui chu April-May ah neih a ni dawn a. Tun hnaiah Cooking gas man a sang chak hle a, inthlan dawna issue bera neih a ni. July 2021 atanga August 2023 chhung khan LPG 14.2 kg cylinder man chu Rs 294 in a sang hman a ni.
Opposition Congress te chuan LPG man sang chu inthlana aupui berah neiin India rama inflation sang nen kum 2023 Karnataka State Assembly inthlanah pawh an chakpui chhan bera ngaih a ni a.
Nikum Madhya Pradesh Assembly inthlanah pawh Congress te chuan thuneihna an chan chuan LPG chu cylinder khat Rs 500 zela pek an tiam avangin loh theih loh BJP te pawhin chutiang chiah chuan thu tiam an siam phah a ni.
Ujjwala beneficiary te India ramah 10 crore chuang an awm laiin domestic cooking gas hmang 33 crore chuang an awm thung a. Sorkar chuan June 2020 khan LPG subsidy pek a ti tawp a, ram pumah cooking gas chu market rate a hralh a nih hnuah national capital ah chuan August 2023 khan bur khat man Rs 1,103 a kai chho hman hial a ni.
Subsidy an kalpui awm chhun chu mirethei hmeichhiate a thlawna Pradhan Mantri Ujjwala Yojana hmanga free connection nei te chauh leh hmun kilkhawra awm te chauh an ni.
Liquified Petroleum Gas (LPG), clean cooking fuel te thingtlang leh miretheite hnena a thlawna pek a nih theih nan hian sorkar chuan May 2016 khan Ujjwala scheme a kalpui a ni. Connection free a pek a nih rualin beneficiary te chuan LPG an thun dawnin market price in an lei a ngai ta thung a.
Fuel man sang zelah sorkar chuan May 2022 khan PMUY benficiary te hnenah rs 200 per cylinder subsidy a kalpui a, October 2023 khan Rs 300 ah a tisang leh a ni.
October 2022 khan sorkar chuan oil company te hnenah a man aia hniam daiha Liquified Petroleum Gas kum hnih chhung lai an hralh avanga tanpuina one-time grant Rs 22,000 crore a pe a ni.