LPG phur lawngin India thleng tep, lawng 16 la tangkhang

LPG phur lawngin India thleng tep, lawng 16 la tangkhang
Asia khawthlang lama buaina a chhuah tan atangin Indian 1,800 velin Armenia leh Azerbaijan kaltlangin Iran an chhuahsan tawh a. Hetih lai hian him taka Strait of Hormuz an paltlang hnuah Indian lawng pahnih, LPG metric ton 62,000 phur chuan tun kar chhungin Indian lawng chawlhhmun an thleng beisei a ni bawk tih Thawhtanni khan thuneituten an sawi.
Israel leh US tang dunin February 28 atanga Iran an beih avangin ram chhuahsan duh Indian-te hi Iran chung boruak khar a nih avangin lei ramri kaltlangin Armenia leh Azerbaijan-ah an kal a ngai ta a. Indian 1,777-in Armenia leh Azerbaijan-ah an thleng tawh a, an zingah hian zirlai 895 leh sangha mantu 345 an tel tih external affairs ministry thupuangtu, Randhir Jaiswal-a chuan thuthar lakhawmtute hnenah a sawi.
“Tehran-a kan embassy hian tun thlengin Iran-a India mi 1,777-te chu Armenia leh Azerbaijan-a an kal theihna tur a siamsak a, chuta tang chuan an ramah thlawhna hmangin an kir leh thin a ni,” a ti a. Armenia-ah hian Indian 1,545 an kai a, Azerbaijan-ah 234 an lut bawk.
Sangha mantute hi Iran-a company hrang hranga thawk an ni a, Inrinni khan Armenia atangin India-ah thlawhna hmangin Chennai an thleng niin Jaiswal-a chuan a sawi a. Tehran-a India embassy chuan Bangladesh mi pakhat leh Sri Lanka mi pakhat hawna a siamsak bawk.
Iran ramah hian West Asia buaina a lo chhuah tirh khan India mi 9,000 vel an awm a, a tam zawk chu zirlai an ni.
Jaiswal-a chuan Indian lawng pahnih – LPG metric ton 46,500 leh Indian thawk 25 phur, Green Sanvi leh LPG metric ton 15,500 leh thawktu 26 chuanna, Green Asha te chuan ni hnih kalta chhung khan Strait of Hormuz an paltlang a, an tum ram panin an kal mek tih a sawi a. Green Sanvi hi Thawhlehniah a rawn thleng a rin thu sawiin Green Asha hi Ningania thleng tura beisei a ni thung.
Strait of Hormuz thlang lamah Indian lawng 16, Indian hnathawk 433 awmna chu an la tang bawk a. Ram dang lawng dang 12, bungraw phur, lei tha phur, India pan tur pawh Persian Gulf thlang lamah a awm tih a sawi bawk.
Indian lawng la tang 16 zinga pakhat hian LNG, LPG pakhat leh tuialhthei thlitfim loh phur panga niin a sawi a. Bungraw dang phur lawng pathum, chemical phur pakhat leh thil chi hrang hrang phur pahnih a awm bawk a. Heng lawngte hi India an pan theih hun tur hi sawi chian theih a la ni lo tih sawiin shipping ministry chuan external affairs ministry nen thawkdunin tuipui kawng pawimawh tak hi an kaltlang theih nan ruahmanna an siam mek tih a sawi.
Iran hian Indian lawngte hi an ram atanga tuialhthei phurh chhuah 50% kalna kawng, Strait of Hormuz an paltlang theih nan a chhan azirin a kaltlangtir thin a. Tun thlengin India lawng pariat, energy phurte chu tuipuiah hian kal phalsak an ni tawh a ni.
Shipping ministry chuan tun thlengin Asia khawthlang atanga tuipuia thawk mi 1,599 hruai kir an ni tawh tih a sawi a, heng zingah hian Pathianni atanga kir mi 180 an tel a. Jaiswal-a chuan Asia khawthlang buainaa India mi pariat thi zinga pasarih ruang pawh India-a phurh haw a nih tawh thu sawiin heng zingah hian tuipuiah thi mi pathum an tel.