LPS Cup Round of 16:
Ramhlun South leh Kawnpui Joint chak
Nilaini zanah Mahindra XUV3OO LPS Cup quarter-final lut pahnih kan hriat belh leh a, an tumpui ve ve hnehin Ramhlun South LC leh Kawnpui Joint VC-te’n last eight an lut.
Ramhlun South LC 5-0 Bethlehem LC
Vanlalthlamuana’n goal hnih thunin Ramhlun South-in si nga faiin Bethlehem an hneh a, Nilaini zanah Mahindra XUV3OO LPS Cup quarter-final an lut.
Rajiv Gandhi Stadium, Mualpuiah vawithum champion tawh Ramhlun South-in fuh takin bul an tan a, minute hnih an inkhelh hmain Lalrohlua Sailo chuan ball vawrh chhuakin captain Lalremruata’n a um fal a, goalkeeper F. Lallawmzuala pet khumin a khung a ni.
Bethlehemin an beilet zo lo a, first half tawp dawnah Danny Zorammawia ball pet atangin Thlamuana’n hnai tak atangin kawh takin a chhuihlut a, si hnih faia hmahruai chungin chawlhlawk an hmang.
Darkar khat an inkhel tihin Danny-a’n Bethlehem beiseina benghniamin Remruata corner pet a tauhlut a; minute sarih hnuah Remruata siamsak atangin JH Remlala’n a chhuihlut ve leh bawk.
Hun pangngai tawpna’n minute ruk a la awm tihin dinglam sir atangin Francis Vanlaldika’n a vawrh a, Thlamuana’n vawikhatah pet lut nghalin Divya Player of the Match lawmman a dawng.
Hun tawp thlengin Bethlehemin hlauhawm thamin an nawr zo lo a, round of 16 kal meka tlawm nasa ber ni chungin khelmual an chhuahsan.
Aizawl District Football Association buatsaih inter village football chanchina team hlawhtling ber Ramhlun South-in kum 2018 hnua a vawikhatna’n champion leh tumin hma lam an pan a, inrintawkna nasa zawk nei zui thei turin Bethlehem lakah an inlan.
Kawnpui Joint VC 3-1 Salem Veng LC
Kawnpui Joint-in hun tawp lamah vawihnih khungin Salem Veng beiseina an titawp a, Nilaini zan Mahindra XUV3OO LPS Cup round of 16-ah goal thum goal khatin an chak.
Rajiv Gandhi Stadium, Mualpuiah eng a that tawk loh avangin second half tan dawnah minute 15 chuang inkhel a khailak a, nikum YMA football-a semi-final lut leh mualneitu ni bawk Salem Veng tlarhnungin hun tawp dawnah an insawrbingna an hloh a; Kawnpui forward Lalkrossmawia’n fuh zeta a tauhluh hnuah Lalrintluanga’n goal ruakah pet lutin hnehna a nemnghet.
Team pahnih player-te inkarah kut thawhin buaina a chhuak zui a, Salem Veng captain Joseph Lalnunpuia hnawhchhuah a nih phah a; Aizawl district pawn atanga sawm bik team pali zinga mi Kawnpui Joint-in coach Malsawmkima hoin quarter-final an lut.
Inhnehtawk takin an innawrtawn a, darkar khat an inkhel tling tep tawh tihin Robert Lallawmzuala’n Aizawl pawn team mamawh a tihlawhtling a, box chhung chiah atangin goal ban hla lam kilah a pet lut.
Salem Veng insiamtharin a hma aia nung zawkin an khel zui a; minute 83-ah Jessie Lalmawizuala penalty box pawn atangin leihrulin a pet a, hlauhawm lo tura ngaih a nih laiin goalkeeper Lalhruaitluanga’n a nam per a, a bula awm Lalnunzira’n awlsam takin a khung.
Minute hnih hnuah Kawnpuiin hma an hruai nawn leh nghal a, Salemin an lamah ball hlohin an tuar zui a, C. Zohmingsanga’n ding lam atanga ball a vawrh chu Krossmawia’n nalh takin a tauhlut a, Aizawl team-in an si phurh sut nawn leh tumin an bei nasa hle a ni.
Hun pangngai tawp hnuah minute 13-na a kal mek tihin Kawnpuiin an beilet thut a, Zohminga ball petchhuah umin Rintluanga’n a khalh fal a, goalkeeper Zosangliana a tlan hel hnuah awlsam takin a pet lut a, lehlam beiseina titawpin buaina a awm zui a, Salem Veng player leh team hruaituten thinrim takin an lungawi lohna an lantir a ni.
Zanina, Zirtawpni zanah round of 16 khelh zawh a ni dawn a; nimin tlai dar 4:30 atangin champion lai Armed Veng leh Durtlang an inkhel a; zan dar 8 atangin Vaivakawn leh Kulikawnin quarter-final luh an inchuh ve thung a, result tarlan hman a ni lo.
Vawiin tlai dar 4:30 hian Republic Veng lehSihphir Venghlun chuan last eight luh an inchuh ve leh ang a, zan dar 8-ah Ramhlun North leh Sialhawk an inhmachhawn dawn a ni.
LPS Cup Round of 16: Ramhlun South leh Kawnpui Joint chak
