LPS Pro Fight quater-final khel zo
HC Lalramfela’n vawi thum hnek tluin Lalbiak-zuala a knockout a, weight hrang pahniha champion thei turin Nilaini zanah Tata SK 612 LPS Pro Fight lightweight semi-final a lut.
LPS Arena, Falkland-ah kum 28 mi Ramfela’n hlauhawm takin a khel a, a hnek tluk hmasak tum hnihah New Vervek fighter Biakzuala tho leh ve ve mah se round hnihna minute khat leh second 44-ah chiang takin a hnek tlu leh a, chhuatah lehlam thalin bawihsawm zui nghal a ngai hial a ni.
LIGHT
Chawngtlai boxer Ramfela hian kum 2015 khan mahni inzir chawpin bantamweight title a hnek chhuak tawh a, hemi hnu hian a champion leh lo a, professional boxing a khelh tawhah tum nga chakin vawi hnih a tlawm. Nikumah light champion nih tumin a kirleh a, Title Fight-ah uiawm takin Vanlalawmpuia lakah a tlawm.
Kuminah Khuangthing boxer Awpa’n Pro Fight title fight rualin WBC India super light title a chuh dawn a, hei vang hian Pro Fight champion a nihna kalsanin light-ah champion thar an awm dawn tih a chiang sa. Ramfela a langsar telh telh a, bantam champion lai Lalrinngheta’n light champion thar nih a tum ve bawk.
Tawnhriat nei lo huang atanga tlang kum 22 mi Biakzuala’n vawi li hnehna a chang zawn hman a, knockout vekin a hmasa pathumah a chak a, a dinhmun a vawrh kang hman viau. Ramfela hmaah erawh awmze nei thamin a inlan zo lo a, an kutchhuak leh an chet dan a inthlau deuh a, Chawngtlai chhuanvawrin chiang taka vawi hnih a hnek zawn hnuah Biakzuala a inveng.
Round khatna tawp lamah Ramfela’n a kuttum ding lamin a bekah a hnek tlu a, a tho leh nghal. Round hnihnaah hnek tluk tumin pakhatin a um a, a ding lam bawkin a bekah a hnek tlu leh. Biakzuala tho leh mah se an inbei tan leh chiang tihin Ramfela’n chiang leh zualin a hnek tlu a, tho tur a awm tawh lo a, luhaiin engemawchen New Vervek boxer a buai a, bawihsawm zui a ni.
Championship kal meka a vawikhatna’n Ramfela’n GIG Motors Fighter of the Night lawmman a dawng a, tum hnih a khelh tawhah knockout ve vein a chak. Inrinni zan semi-final-ah thahrui leh thiamna nei Lunglei Luangmual boxer Lalmuanpuia nen an intawng dawn a, Chawngtlai tlangval tan a awlsam bik lo mai thei.
WELTER
Welter-ah Vanlalruatpuia’n Lalhruaisanga hnek tlu thei bik lo mah se harsa lo takin a chak a, round tin la vekin unanimous decision-in a hneh. Saikhamakawn rawlthar hian a vawikhatna’na Pro Fight semi-final lutin naktuk zanah Khawhai tlangval C. Remruatsanga nen an innuai ang.
Kum 19 mi Ruatpuia’n kawng hrang hrangin inhnek a thunun a, hnek fuh hnem zawk ni chungin a hman thiam a vei lamin na takin a vai hnem a, hnek tluk tuma a beih luatah a hnek chhuak tam tawk lo. Kum 17 mi Hruaisanga’n a ding lamin a hnek let a, lehlam ralthuam hlauhawm veng theiin nghing loin a ding tluan.
Kum 2019 khan Ruatpuia’n Pro Fight round of 16 a lut a, tun hi a tum hnih telna niin, welter huangah beiseiawm takin hma lam a pan. Kum li kalta khan National School Games-ah gold medal a hnek chhuak tawh a ni.
MIDDLE
Middle-ah a vawikhatna’n F. Lalthanliana Junior a inlan a, minute khat leh second 37 chiah an inbei hman tihin a bitum Teikhang tlangval Vanlalruata a inhnukdawk a, technical knockout-in a chak.
A theihna tilang tur khawpin kum 23 mi Lunglei Electric Veng boxer a che hman lo a, chutih laiin kumin kum tir khan Mizoram Fight Night-ah a champion. Inrinni zan semi-final bout-ah Siaha fighter Daniel Beipasasa nen an intawng dawn a, fiahna tling inhnek a hmachhawn tura ngaih a ni.
BANTAM
Tun kum hnih chhunga hmasawn Omega Lalramdina’n unanimous decision-in tawnhriat nei lo huang atanga tlang Lalpianpuia a hneh a, semi-final lamah kuttum hlauhawm Pangzawl fighter Ramdinthara nen an inhmachhawn ang.
Kum 21 mi Ramdina hian nikum Pro Fight-ah quarter-final a lut pha lo na a, chawl loin a bei zui a, professional luhchilh telin vawihnih a khelh tawhah a chak ve ve. Championship kal mekah thiamna nei pangngai tak a la bitum lo a, tharum hmangin Khuangthing tlangval Pianpuia’n a nawr tluan zak a, a bawh buai nasa.
Dinthar boxer-in dik leh dak takin a lo hnek a, insaseng zuiin a ngila a hnek bakah a vai fuh hle bawk a, harsa lo takin 30-27, 30-27, 30-27-in a chak a, inhnek a thunun tluan.
FLY
Semi-final lama intawng turin Vanlalenkawltira leh Lalmuankima’n unanimous decision ve vein Hmingthanmawia leh Lalchhuanawma an hneh.
Thiamna leh tharum nei tel Enkawla’n round hmasa berah Thanglailung boxer Hminga a hneh lo zawk na a, round hnihna atangin a beilet a, tha takin a kir leh.
A tir lamah kum 20 mi Champhai Dinthar boxer-in chet a harsat a, North East Senior-a medal pakhat aia tam hnek chhuak tawh Hminga’n vawithum a hnek thle zawn a, inhnaih chilhah rang leh dik takin a hnek thei bawk.
Round hnihnaah Enkawla’n a hma aia tha zawka inveng chungin a nawr a, tharum leh thahrui nei zawk a nihna chhawr letin a hnek tam a, hnek dan chi hrang hmangin a tibuai tel. Rawlthar kum 19 mi Hminga a tanhmun phetin, a chhanglet zo lo a, a tawp thlengin a bet.
Judge pathumin 29-28 vekin Enkawla an chaktir a, nikum aiin hma a sawn tih a lantir tel nghal.
Kum 2022 khan Champhai Dinthar tlangval hian quarter-final stage-ah champion ni ta Laldinsanga khing thei viau mah se a hnar thi nasa avangin a khel tluan thei lo a, kuminah a chet dan atangin mi dang tan vaukhan a siam.
Mamit Bazar Veng boxer Muankima’n a vei leh ding tlang tha takin a chhuah zawn a, a nawrtu zawkah tangin ngam takin kum 20 mi Chhuanawma a hmachhawn. Kut rang zawk a nih bakah a hnek chhuak hnem a, North Vanlaiphai tlangval Chhuanawma’n tha taka hnek chang nei ve mah se a tawpah 30-27, 29-28, 29-28-in kum 18 mi Muankima a chungnung.
Semi-final atangin round li an khel dawn a, professional boxing glove an hmang bawk ang. Chutih laiin Title Fight chiah boxrec-ah ziahluh a ni ang.
LPS Pro Fight quater-final khel zo
