Tun hnai khan, danin a phal loh bleaching powder leh dynamo hmanga Mat luia nungchate suasamtu mi pathum chu man an ni a. Phalna nei lova luia nungcha man hi jail tan theihna a nih bakah pawisa chawi theihna a nih thu hrilhfiah an ni a, District Fisheries Development Officer, Hnahthial hmaa inlan tura hrilh an ni bawk. A bak chu, eng tin nge heng dan bawhchhetu mi pathumte chungah hian action lak a nih tih hi hriatzui tur a la awm fumfe lo niin a lang.
Lui humhalh a tulna leh a pawimawhzia te, luia nungchate man nana tûr leh khawl (dynamo) hman a that loh dan te kan hre tlang vek. Chuti chung chuan, hetiang hmanrua hmanga luia nungchate suasamtu hi manchhuah tur tun thlengin an la awm a, man chhuah loh hi an awm reng ang tih a rin theih bawk.
Lui dung humhalh hna/mawhphurhna hi forest deptt kut niin a lang a. Khawtlang leh pawl hrang hrangte nena thawhho hi a tha hle a, chutih rualin a kaihhnawih department lam hian lui dung humhalh kawngah hian, uniform leh ralthuam nena ramhnuaia patrolling hi nei reng tura beisei an ni a. Tuna lui suasamtute man a nih theih chhan pawh hi ‘thudawn bawhzui’ nia sawi a ni a, hei hi a lawmawm rualin, thudawn chauha innghat kan ni ang tih erawh a hlauhawm.
Tin, luia nungcha man hi jail tan theihna a nih bakah pawisa chawi theihna a nih thu hi, zau zawk leh uar zawkin mipui hi kan inhrilh zau a va tha awm ve maw le.
Chutih rualin, mipuite hian kan luite hi bawlhhlawh chi hrang hrang vawm luh nan kan hmang bawk a. Eng tin nge ‘mipui’ kan bur bun tak mai kan tih chuan, kan chenna in leh a chhehvel bakah kawng kam kawr ruama bawlhhlawh kan thehthangte hi ruahsur hunah tuihawkin luiah a len lut a, hei hi mimal pahnih khat tih mai ni lovin, a titu chu ‘mipui’ kan ni tlat a ni. Hetianga kan lui tihbawlhhlawh hi lui dunga sangha suasamtute ang thoa huatthlala a ni a, kan nunna hnar, kan tui tlan hi humhalh ahnekin mipui pawh hian kan suasam chu a ni ber lo’m ni? Kan ram luite hi, tûr leh dynamo lakah chauh lo pawh, bawlhhlawh lakah pawh humhalh turin mipui kan tanrual a ngai hle a ni.
Lui humhalh…
