Tlawng fintu lui hnar thenfai beihpui thlak mektuten an tih fai hnu an enlehnaah bawlhhlawh paih thar a lo awm leh nghal zel chuan an rilru a ti na takzet tih an sawi.Lui thianfai tura mi thahnemngaiten pawl an din – Save the Riparian hian Tlawng fintu lui hnar tih fai beihpui an thlakna kal zelah Thawhtanni khan an tihfai tawh sa enletin heng luikawrah hian bawlhhlawh tharlam tak tak paih a awm tih an hmuchhuak.
Tlawng lui fintu luikawr hi March 26 atang khan thenfai hna an thawk a, bawlhhlawh trip engemaw zat Tuirial Solid Waste Management Centre-a paih tawh niin, luikawrah hian plastic leh pawnchhe hnawlin vung a siam nasa hle tih an sawi. Heng vung hi a vaia lakchhuah zel an nih avangin hna a chak mawh hle tih an sawi bawk.
Tuna luikawr thenfai mek, Mission Vengthlang leh Model Veng inrina luikawrah hian diaper leh hmeichhe pads a tam hle a, puanchhia chi hrang hrang – blanket, rizai, leh a dangte pawh a tam hle tih an sawi. Frontline team leader Romalsawma chuan kan luikawr pianhmang hi heng bawlhhlawh ho vang hian a danglam hle a, thuah tam tak bawlhhlawh then zel a ngai tih a sawi a ni. Thenfai hna thawh chhunga an hmuhchhuah chu, luikawr kama in neituten septic tank pipe direct takin luikawrah ek an luanchhuah tir tih a sawi a ni.
He project kalzelah Save the Riparian chuan luikawra bawlhhlawh paih tawh lo tur leh an hmalaknaa mipui thlawp an mamawh tih an sawi a. Thenfai hna thawk reng mah se, an thenfai tawh sa tih bawlhhlawh a nih zel chuan hna a sawt lo hle a. Tunlaia ruah a sur avangin bawlhhlawh hi tuihawkin len thla ve reng mah se, luikawr kuanga paih thar a awm reng chu an rilru a na takzet tih an sawi a ni.
Lui thenfai hnu ah bawlh hlawh thar awm nghal zel
![](https://theaizawlpost.org/wp-content/uploads/Clipboard01-458.jpg)