Fisheries minister Lalthansanga hriatpuinaa in Fisheries department leh Central YMA chuan luidung humhalh turin Thawhlehni khan thawhdunna thuthlung an ziak a. Fisheries department aiawhin director Zonuntluangi leh Central YMA aiawhin president R Lalngheta ten hming an ziahhnan.
Fisheries minister chuan an department tan luidung zawng zawng vil a harsa a, YMA-in luidung humhalh nachang hria a, branch-ten theihtawpa mahni huamchhunga hma an lo la thin chu a lawmawm hle tih a sawi. Lungrual taka Fisheries department leh YMA thawhdunna chuan rah tha a chhuah tawh thin a, kum hnih an thawhdun lehna turah Fisheries Acts leh Rules hnuaiah awmze nei leh tangkai zawka luidung hausakna hman kawngah hma an sawn phah ngei a beisei tih a sawi a ni.
Fisheries department leh Central YMA hian kum 2021 atang khan thawhdunna thuthlung kum hnih atan zel an lo ziak tawh thin a, tunah hian a tum thumna atan an ziak leh a ni.
He thawhdunnaah hian luidung nungcha venhim leh humhalh kawngah nasa takin rah tha a chhuah zel a, tunah hian YMA branch 93-in luidung humhalh bik an nei. He hmalakna avang hian Mizoram luidungah sangha an pun phah mek zel bakah luidung humhalh inzirtirna kawngah, luidung venhim leh dan phal loh hmanrua hmanga sangha man chingte manchhuah kawngah Fisheries department-in chak zawkin hma a lak theih phah tih sawi a ni.
Thawhdunna tur:
8 Mizoram Fisheries Rules 2019-in a sawi Fisheries Conservation Board (State, District leh Village Level) ah YMA aiawh member an awm thin ang.
8 Central YMA-in luidung nungcha humhalh a tulzia mipui a zirtir thin anga, ruahmanna siamin a hlawhtlinna turin a remchan angin hma a la ang. YMA Inkhawmpui leh Group/ Sub-Hqrs inkhawmpuiah luidung nungcha humhalh pawimawhna an inzirtir thin ang.
8 Luidung humhalhna kawng hrang hrang – nghafuan ven leh sangha man loh hun (closed season) puanzar kawngah leh dan phal loh hmanrua hmanga luidung nungcha mantute manchhuah kawngah YMA-in department a pui thin ang.
8 YMA Branch-ten Fisheries department kaihhruaina hnuaiah luidung humhalh bik an nei thei ang.
8 YMA Inkhawmpuiah luidung nungcha humhalh tha lawmman sem thin a ni ang. Lawmman chu sumfai leh chawimawina thuziak a ni anga, Central YMA-in a buaipui ang. A senso hi Fisheries department-in a tum ang.
Luidung humhalhah Fisheries leh CYMA thawkdun zel dawn
