Mizoramah dam chhunga lung ina tang tura thiam loh chantir vanga tang mek mi 56 an awm.
Prison department-in a chhinchhiah dan thar berah Mizorama jail 10 awmah, dam chhunga tang tura an chungthu rel sak 56 awmin, heng zinga 53 hi Central Jail Aizawlah an tang a; District Jail Kolasib-ah pahnih leh District Jail Lawngtlaiah pakhat an tang bawk.
Kumin July 25 thlenga chhinchhiah chinah Mizorama jail 10 awmah hian tang awm thei zat tura ruahman ang chu 1386 a nih laiin, tang 1838 an awm a; heng zinga 1581 hi mipa niin, hmeichhia 237 awmin, hmeichhiaten an tanpui naupang 20 an awm bawk.
Tang zingah hian court-in an chungthu a ngaihtuah mek 1204 an awm a, an zinga 198 hi hmeichhia an ni. Court-in an chungthu a rel fel tawh, an pawikhawihna hu anga court-in an chungthu a rel fel tawh zingah, hrehawm taka tang tura a tih mi 321 an awm a; heng zinga 32 hi hmeichhia an ni. Hrehawm taka tang tura tih ni lem lo, tang tura chungthu rel sak 237 an awm bawk.
Tang awm thei zat aia tang an tam viau lai hian, tun dinhmunah tang awm thei zat bituk sa ang zat aia tang awm tlem jail 5 a awm thung a. District Jail Siaha, Lawngtlai, Kolasib, Serchhip leh Mamit an ni a. District Jail Lawngtlaiah hi tang 98 awm theihna tura duan niin, 32 an tang mek a; District Jail Serchhip hi tang 128 awm theihna tura ruahman niin tang 57 an awm mek a, tang nei tlem zual pahnih an ni.
Lung ina dam chhung tang tur 56 awm mek
