Tunisia rama police laka a lungawilohna a lantirna lamah Tunisian footballer Nizar Issa-oui chu a inhal hlum tih a chhungte’n an sawi a; karliamta Zirtawpni khan vuiliam a ni a, mitthi vuinaa kalte’n an thinrimna an lantir nasa hle a ni.
Issaoui hi thei zuar nen an inhnialbuai hnuah online kaltlangin video a post a, tah chuan police officer-te’n firfiaka che-ah an puh tih au-chhuahpuiin, post dang a siamah a inhal hlum tur thu a tarlang bawk.
Zirtawpni kalta khan an khua Haffouz-ah kum 35 mi hi vui a ni a, tah chuan a vuitu mipui thinrim leh policew lam an intawng hial tih tualchhung media-te’n an chhuah.
Issaoui hi balhla zuar nen an thu a inhmu lo a, balhla kg khat chu an ram pawisa dinar 10 tling loa lei a tum chu a zuartu hian phal loin, an tualthu a chhiat hnuah police an inrawlh a, police officer-te hian footballer hi che fir-fiakah puhin, Issaoui thung hi chuan sawr-karin balhla man a bithliah aia a let zeta toin balhla neitu hian a zuar niin a puh ve thung.
Facebook post-ah Tunisian footballer hian balhla lei chungchanga an inhnial hnuah police station-a hruai a nih thu leh balhla man sawisel ringawt pawh firfiaka chetna (terrorism) an tihsak chu a paidai thei lo tih a sawi.
A inhal hlum hnua a vuinaah hian footballer tantute leh police lam intibuaiin, mipui hian lungin an tawng a, police lam hian tear gas an hmang ve bawk.
Nizar Issaoui hi Tunisian top-flight club US Monastir-a khel thin niin, fa pali a kalsan a ni.
Tunisian sawrkar chuan Issaoui thihna chungchangah hian thuchhuah an la nei lo.
Lungawi loh vangin Tunisian footballer inhal hlum
