Lunglei district-ah hmun him lamah chhungkaw 125 inthiarchhuak tawh
Tunhnai ruahsur nasa avangin Lunglei district-ah leimin, tuilian leh thli thawk avanga an chenna in rauhsan chhungkaw 125 an awm tawh.
Ruahsur nasa avanga Lunglei district hmun hrang hranga chhiatna leh harsatna thleng chinfel dan leh chhiatna lian zawk a thlen zel lohnana hma lak dan relin Thawhlehni khan district bawrhsap Navneet Mann hoin a kaihhnawih sawrkar official-te an thukhawm.
Nunphung tikhaihlak thei leh mihring himna tiderthawng thei hmun thenkhat ngaihven ngai lai bika hma lak dan tur sawi niin, thuneitu sang zawk leh mithiamte nen inrawn tlanga bawhzui rel a ni. Police-in Theiriat kawng chung kawng tlabal chu lirthei tlan phal loha an khar thu leh bawrhsap thupek angin NH-54 kawngpui Tawipui North-II daia lirthei chetsual tamna hmuna hmalakna hmasa atana ‘fimkhur tura inhriattirna’ police-in an tar tih sawi a ni.
May 30 atanga thli leh ruah thawk chuan Lunglei district-ah chhiatna, June 3 chawhma dar 10.00 thleng khan District Emergency Operation Centre chuan chhiatna thleng report 108 a dawng tawh a. Leimin vanga chhiatna hmun 80 chuang, thli vanga chhiatna hmun 10 chuang leh tuilian vanga harsatna hmun 10 chuangah a thleng.
He’ng chhiatnaah hian mimal in leh lo leh huan thlai chhia engemawzat awmin, thlanmual min, vantlang leh kohhran bungrua leh hmunhma chhia, kawng leh lei chhia engemawzat a awm bawk.
Leimin, lung tla leh chirh tawlh nasa avanga khaw kar leh khaw chhung inkalpawhna ping engemawzat awmin, hengte hi a theih ang angin thenfai hna thawh nghal zel a ni. An chenna in dinhmun hlauhawma a awm avangin chhungkaw 125 an inthiar chhuak tawh a. Heng chhiatna avang hian an district-ah thi leh hliam erawh an awm lo.
Lunglei district-ah hmun him lamah chhungkaw 125 inthiarchhuak tawh
