Lunglei district-ah inthlan duty
tur vote thlak hma dil 600+ awm
Village council leh local council inthlan turah Lunglei district chhunga inthlan duty tur zingah an duty-na hmun an pan hmaa vote thlak duha diltu mi 600 chuang an awm tawh a. February 7 thleng hun hawnsak an ni.
Lunglei district-a VC leh LC inthlanpui buatsaih tura mawhphurhna hrang hrang chelh tura ruat, nodal officer-te chu Thawhtanni khan district election officer Navneet Mann hoin an thukhawm a. Nodal officer-te hian hma an lakna report pein, inbuatsaihna tluang taka kalpui a ni tih sawi a ni.
Inthlan kaihhnawiha mawhphurhna neite tan postal ballot hmanga vote thlak theihna ruahmanah, district danga vote nei, postal ballot hmanga vote thlak tumte tana hun hawn chhungin dilna 103 dawn a ni a; Lunglei district chhunga vote nei tan February 7 thleng dilna hun hawn a la ni a, tun thlengin dilna 500 dawn a ni tawh.
Lunglei district-a VC 88 leh LC 24 awmah VC pahnih (seat 3 ve ve awmna) ah inthlan chuhtu awmchhunte chuh buaitu an awm loh avangin vote thlak ngai loa tlinga puan an ni a. VC 86 leh LC 24-ah, seat 486 (general seat 356 leh reserved seat 130) atan inthlan hi buatsaih a ni ang.
Lunglei district-ah inthlan duty tur vote thlak hma dil 600+ awm
