Lunglei district-ah nausen thla
1 hnuailam nausen 12 thi tawh
Sawrkar kum anga chhutin kuminah Lunglei district-ah nausen thla khat hnuailam nunna chan 12 an awm tawh a. Nau chunga nu thi pathum an awm.
District Level Child Death & Maternal Death Review Committee Lunglei chu additional DC James Miahlung hoin Thawhlehni khan an thukhawm a. Kumin April atanga October chhunga Lunglei district-a naupang thihna leh nau chunga nu thihna thlen dan thlirhoin, chutiang thihna a thlen lohnana hmalak dan tur an sawiho.
Thutkhawma report danin, 2024 April leh October inkarah Lunglei district-ah naupang kum 5 hnuailam thi 18 awmin, an zinga 12 chu nausen thla khat hnuailam an ni. Hemi chhung hian nau chunga nu thi pathum an awm a ni.
Lunglei district-a Health & Family Welfare leh department danga thawktute, damdawi in leh health centre hrang hranga thawktute leh vanduaina tawk chhungte an tel a. Deputy chief medical officer Dr Lalrinthangi chuan nu leh naute enkawl danah tihsual palh leh tihfel tawk loh awm theite thlirlet a, insiamthat theihna atan he Committee hi buatsaih a ni, tiin, vanduaina tawk chhungte pawh koh tel an ni thin tih a sawi. Kumin April 22 leh October 31 inkar chhunga Lunglei district-a naupang kum 5 hnuailam thihna leh nau chunga nu thihna thleng a sawi a; a chhan leh vang nia lang a sawifiah bawk.
Thutkhawmah hian nausen thihna leh nau chunga nu thihna hi a mal mala thlirhoin, vanduaina thlen chhan nia lang leh chumi pumpelh thei tura hmalak dan tur a awm leh awm loh te sawi a ni.
Naupang thihna leh nau chunga nu thihna a thlen lohnan hriselna lam thawktute leh damdawi in lam chuan an theih chin chinah theihtawp an chhuah tih sawi niin, vanduai vang liau liauva thihna thleng a awm bakah thenkhat chu an damloh veleha damdawi in panpui thuai loh vang, damdawi in panna kawnga harsatna awm vang, duhthusama khawl leh hmanraw changtlun tawk loh vang, nu hrisel lohna vang, nau pai laia inenkawl that tawk loh vang a ni bawk tih sawi a ni. Heng harsatna avanga thihna a thlen tawh lohnan nu leh paten fate damlo a ranglama damdawi in panpui nachang hriat a pawimawh tih sawi a ni a; nau pai laia inenkawl that leh inentir ngun a pawimawh thu, damdawi in ngeia nau neih a pawimawh thu, thawktu leh hmanruaah Lunglei district tihchangtlun a pawimawh thu te sawi a ni.
Lunglei district-ah nausen thla 1 hnuailam nausen 12 thi tawh
