Lunglei district khaw 30 thlanah
HIV laka himna tur inhrilh dawn
Mizoram State AIDS Control Society (MSACS) bultuma HIV chungchang inzirtirna leh thisen endik runpui kalpui tur, ‘Intensified IEC Campaign & HIV Test Drive 2025’ chu Lunglei district tan additional DC Zoramdini’n Ningani khan a hawng.
Mizorama IEC Campaign & HIV Test Drive kalpui tur hi kumin August 12 khan chief minister Lalduhoma’n a hawng a. Lunglei district-ah District AIDS Prevention & Control Committee chuan khaw thlan bik 30-ah HIV/AIDS leh inpawlna atanga natna inkai chhawn theih inzirtir leh thisen endik (HIV test) runpui kalpui a tum a ni. Zirna inah inhrilhhriatna buatsaih a nih dawn bakah Lungleia MSACS staff-te leh VC leh YMA nen tanghoin hma lak tum a ni.
MSACS kaltlanga Mizorama HIV/AIDS chungchanga hmalaknaah, Mizorama District Hospital, PHC leh Sub-Centre thlengin a thlawna HIV endik theih tura ruahman a ni a. HIV enkawlna damdawi ART lakna tur district tinah ART Centre dah a ni. Damlote counselling tha tak pek an nih bakah damdawi an ei that leh that loh ngun taka vil zui reng a ni a. HIV kai thei dinhmuna dingte HIV kai loa an him zel theihnana umzui turin Sampoorna Suraksa Kendra project pawh district hrang hrangah kalpui mek a ni bawk.
HIV kai awlsam bik, high risk group – IDU (damdawia inchiu thin), FSW (hmeichhe inzuar), MSM (mipa leh mipa inkawp) leh migrant population (bridge population) zinga hmalakna (targetted intervention) ah Mizoramah NGO hrang hrang hnuaiah project 36 kalpui mek a ni a. HIV leh STI endikna kalpui reng niin, HIV laka invenna hmanrua hrang hrang – hriau, condom adt sem thin a ni. Ruihhloa inchiu thinten an bansan theihnan a thlakna, OST damdawi lakna tur OST centre 17 leh satellite OST centre 68 din a ni tawh a. Heng hmalaknain a thlen phak lohna thingtlang khuaah link worker scheme (LWS) dah niin, Mizoramah LWS 8 hmangin khaw 537 tuam chhuah a ni.
Lunglei district khaw 30 thlanah HIV laka himna tur inhrilh dawn
