Site icon The Aizawl Post

Lunglei Fire Station-in Thawktha chawimawina dawng

PM being felicitated awards to awardees of the Subhash Chandra Bose Aapda Prabandhan Puraskar at 3rd Session of National Platform for Disaster Risk Reduction, in New Delhi on March 10, 2023.

Lunglei ram kang thelhnaa an thawh that avangin Lunglei Fire Station chuan India ram pum chawimawina sang a dawng.
‘3rd Session of National Platform for Disaster Risk Reduction’ (NPDRR-2023) chu Prime minister Narendra Modi chuan Zirtawpni khan New Delhi-ah a hawng a; India rama mahni hnathawhnaa inpe, huaisen leh hnathawk tha lawmman ‘Subhash Chandra Bose Appda Prabhandan Puraskar Awards 2023’ sem nghal niin, he lawmman dawngtu zingah Lunglei Fire Station Mizoram a tel.
Award hi Fire & Emergency Services director Lalzahngoa leh SP Francis Lalnuntluanga Ralte ten Prime minister hnen atangin an dawng a. Certificate leh sumfai cheng nuai 51 a kengtel.
Lawmman semnaah hian kum 2021-a Lunglei ram kang chungchang video tawi tihlan a ni a, video siam tur hian February 2021-ah Delhi atangin official-te Mizoramah lokalin a hmun an tlawh a ni.
‘Subhash Chandra Bose Appda Prabhandan Puraskar Awards 2023’ dawng thei tur hian nomination 274 lut atangin Odissa Disaster Management Authority leh Lunglei Fire Station thlanchhuah an ni a. Lawmman semnaah Fire & ES official-te bakah Mizoram Homeguards commandant general cum director Zosangliana Hualngo leh Disaster Management & Rehabilitation deputy secretary Lalrinawma Traite te an tel bawk.
He hunah hian Union Home minister Amit Shah leh Union minister of state for Home Affairs Nityanand Rai te pawh an tel a ni.

Exit mobile version