Lunglei Government College (LGC) kum 60 tlin, Diamond Jubilee chu Thawhlehni khan an college hmunah an lawm a. minister Lalrinpuii leh Lunglei West bialtu MLA T Lalhlimpuia te bakah sawm bik midangten an hmanpui.
LGC Diamond Jubilee hriatrengna lungphun chu minister hian a hawng hmasa a. Lunglei West bialtu MLA hian a MLA Fund atanga a saksak, LGC Diamond Jubilee hulhliap (shed) chu a hawng ve bawk.
Minister Lalrinpuii chuan mithiam, rilru changkang leh zirna lama rual awt em em, Lungleia college bul tantute zahna chibai bukin, an thawh rah avangin college-in hmunhma tha tak a neih piahlamah tun hnu zela thawktute inpekna avangin college pawhin hma a sawn zel a, mithiam leh mi hlawhtling tam tak chher chhuah an ni tawh tih a sawi.
Zirlaite chu kan ram mawina ngaihlu a, tlawh uar turte, piputen ngaihsan leh ngaihhlut tur dik an lo kalpui thin chhunzawm thar a, ram, khawtlang, kohhran, chhungkua leh mimalin kan neih sa ngaihlu a, a hlutna belhchhahnan hma la zel turin a chah a ni.
Lunglei Govt College hi 1963 September 10 khan mi thahnemngaiten ‘Lungleh College’ tih hmingpu in an din a. Gauhati University pawmpuina (recognition) tel loa kum khat kalpui a nih hnuah, principal puitling hmasa ber atan Baptist Kohhran pastor Rev Dr CL Hminga sawm niin, a ni ho hian university pawmpuina hmuh a ni. Principal puitling hmasa ber Rev Dr CL Hminga’n hna a zawm ni, 1964 September 10 hi LGC din tan ni atan hman a ni.
LGC-ah hian Bachelor of Arts (BA) leh Bachelor of Science (B.Sc) zirna awmin, 2024- 2025 academic session kal mekah zirlai 932 (BA 787 & B.Sc 145) an awm a. Zirtirtu 69 leh thawktu dang (non-teaching staff) 17, an vaiin thawktu 86 an awm. College din tirh atangin principal 22 an awm tawh a ni.
LGC-ah hian thawktuten an hriat theih chinah, kum 1964 atanga 2024 thlengin BA pass 3201 leh B.Sc pass 666, an vaiin pass chhuak zirlai 3867 an awm a. Kum 1996 atang khan university top ten-a lang zirlai 114 nei tawhin, university gold medalist 13 an nei tawh.
Mipa leh hmeichhe hostel neiin, zirlai engemawzat an awm mek a. Diamond Jubilee denchhena an thil tum (Jubilee academic goal) chu – pass percent sang zawk nei tura tan lak, university exam-a gold medalist tam zawk chher chhuah leh university exam-a top ten tling pha tam zawk chher chhuah a ni tih principal C Zairemthanga chuan a sawi.
Lunglei Govt. College-in an kum 60 tlin an lawm
