Site icon The Aizawl Post

Lunglei mipuiin lawmthu in sawi ka beisei – MNF Thalai president

Municipal Council dinsaktu MNF sawrkar chungah Lunglei mipuiin lawmthu an sawina an lantir ngei a beisei tih MNF Thalai president Dr L. Thangmawia chuan a sawi.

MNF Thalai Hqrs hruaituten Zirtawpnia MNF Sub-Hqrs Lunglei office an tlawhnaah Dr L Thangmawia chuan hun reilote ah Lunglei khawpui enkawltu municipal council inthlan kan hmachhawn dawn avangin MNF mipui tanrual a ngai a, Lunglei mipui pawhin municipal council dinsaktu MNF sawrkar hnenah lawmthu sawina an lantir ngei a beisei tih a sawi.

Chief minister Pu Zoramthanga kaihhruaina hnuaiah sawrkar chuan Lunglei mipui hmasawnna turin hna tamtak a thawk tih sawiin, kumin chhunga chhungkaw nuai khat tuamchhuak thei turin SEDP kalpui mek a ni tih a sawi bawk.

MNF Thalai vice president Zodinpuia pawhin kum 2018-a MNF manifesto-ah zirlai leh thalaite tan hmalakna tura tarlan point 11 chu tihhlawhtlin vek a ni tawh tih a sawi a ni.

MNF Thalai hruaitute hian Lunglei Municipal Council office an tlawh a. CEO H Lalhmingthanga chuan lo dawngsawngin, LMC hmalakna a lo hrilhfiah. MNF Thalai president chuan MNF sawrkarin Lunglei mipui a ngaihsak avangin sum harsatna hnuaiah pawh municipal council inrelbawlna atan kum 2021- 2023 chhungin cheng nuai 160 chuang budget atangin a ruahman sak tawh tih a sawi a ni.

Exit mobile version