Lunglei High Power Committee office ruahmanin HPC member-ten Lunglei khawpui leh a chhehvela kum 2019-2020 chhunga department hrang hrang hnathawh thnekhat a hmunah an tlawh.
Site visit-ah hian HPC member-te team hniha inthenin team khat hian EE Building Division PWD Lunglei hnuaia hna kal mek pathum – State Sports Academy Zobawk, College Auditorium cum Annexe Lunglei Govt College leh Saikuti Hall Renovation-te an enfiah a. Team dang hian Power Maintenance Division-1, P&E hnuaia Construction of 132 kV Transmission Line from Melriat to Khawiva bakah UD&PA hnuaia veng hrang hranga kea kalna siam hna thawhte an enfiah a ni.
Hna khawihtu department leh project neitu department bakah contractor-te pawh telin hna kal mek, hmalak tulte leh harsatna awmte a hmunah sawi ho nghal zel a ni a. Site visit team-te hian HPC vice chairman hnenah report an thehlut dawn a ni.
Kumin July 29 & 30 khan Lunglei district huamchhunga sawrkar department-te hmasawnna hnathawhte zir hoa hmalak ngaite sawihoin HPC vice chairman Lawmawma Tochhawng leh Planning secretary Dr C. Vanlalramsanga te kaihhruaiin ni hnih awh ‘review meeting’ neih a lo ni tawh a. Tuna site visit hi he hmalakna kalzel niin a tum ber chu, department hrang hrangte hmalakna chiang taka hriat a, an harsatna neihte sutkian theih dan ngaihtuah hoa, a theih ang ang district level-a chinfel tum a, chinfel mai theihlohte state sawrkar hotute hnena thlensak a ni.
(THE AIZAWL POST – Tualchhung)
Full>> ePaper Subscribe
