Site icon The Aizawl Post

Lungleiah RT-PCR dahna hawng

Civil Hospital Lunglei-a Integrated Laboratory leh naupang damlo na zual enkawlna tur, khum 12 awmna Pediatric ICU chu Inrinni khan Health & Family Welfare minister Dr R Lalthangliana’n a hawng.
Covid lai, RT-PCR buaipui lai khan RT-PCR chu mipuiin Covid damdawi emaw kan ti hial nia a lan thu leh sawifiah fe pawhin mi tam takin an hriatchian hleih theih loh thu Health minister hian a sawi a. Covid mai ni lo, thil hrang hrang test-na atana hman theih dawn avangin, tuna ami pawh RT-PCR building angin an hawng lo tih a sawi a ni.
Civil Hospital Lunglei tichangtlung turin SEDP atangin cheng nuai 190 leh North Eastern Council atangin nuai 392 ruahman a ni tih a sawi a. Trauma Centre, CMO office leh ICU an hawng tawh a. Hei bakah Hospital tihchangtlun nan World Bank a dawr rahchhuah atangin Lunglei Civil Hospital-in cheng nuai 300 chuang a hmu dawn tih a bawk.
Integrated laboratory chu district danga awm ve lo a nih thu leh building chhawng chunglam pawh tihchangtlun zel turin sum an dahfel tawh tih Dr R Lalthangliana hian a sawi a. Serchhip leh Kolasib District Hospital chu cheng nuai 2000 ve ve a sak tan mek a nih thu te, district thar pathum Hospital thar sak nan cheng nuai 1700 an hmuh dawn thu te a sawi a ni.
Cheng nuai 70000 senga Japan International Cooperation Agency nen tangduna ruahman tur Cancer Superspeciality Hospital-a Zemabawka din tum mek pawh vawiin – February 27 hian sawrkar laipui leh JICA ten final MoU an ziah tur thu a puang a ni.
Laboratory dinna sanctioned amount hi cheng nuai 192.98 niin, work order amount chu nuai 145.56 a ni a. 2021 October 28-a thawh tan niin, 2022 October 28-a zawh a ni. Mizoram PWD hnuaiah contractor KT Nghawra, Lunglei Zohnuai sak a ni a. Laboratory-ah hian Covid mai ni lo, thisen chi hrang hrang test-na’na hman theih a ni.
Pediatric ICU hi sawrkar laipui ‘India COVID-19 Emergency Response & Health System Preparedness Package: Phase-II (ECRP-II package)’ Scheme kaltlanga ruahman niin, Intensive Care Unit (ICU) khum 4 leh High Dependency Unit khum 8 a awm a ni.

Exit mobile version