Mahmuaka Chhakchhuak
Zan lungngaihthlak,
Zion pindan chhungah,
Ka Lalpa’n a thisen a semin,
Chuti-anga lungngaih chhumpui zing chuan,
Ka Lal thlaphangin a lo rum tir
Aw, nangni Jerusalem te u,
A khawngaih in chan kha hria ula,
In nat tinreng a tihdamsak che u
A lungngaihna haider lul suh u
Tia Patea’n (1894 – 1950) he hla a lo phuah hi a thuk ngawt mai. Zion pindan chhungah a han ti hi hrilhfiah hmasak loh chuan mi nazawng hriatthiam theih pawh nia hriat loh laiin chutia han hrilhfiah hleihtheih a nih lohna lai a awm tlat bawk si a. Patea hian engtiang taka helai boruak hi hmu fiah a, hrefiah nge a ni tih hi keini hriat phak rual lah a ni bawk si lo. Mizo Kristian thinlungah erawh chuan sawifiah nawn ngai lo turin a fiah deuh riau bawk nen hian tisa thinlung chu hrefiah kil kel lo mahsela thlarau mitin a fiah e tih mai a ngai zawkin a lang. Patea hian hla a phuah dawn reng reng hian ina a awm pawhin a rum ngal ngal thin a, fianrial panin a relh bo leh daih thin niin a chanchin ziaktu B. Lalthangliana chuan a ziak a. Chutiang taka thinlung zawng zawng nena a hla phuahte chu vawiin thleng pawha ngaihhlut a nih chhan pawh a ni thei awm e.
Patea hian hla 55 a phuah a, Mizo thlûka Kristian hla phuahtu hmasa bera pawm a ni. A dawtah CZ. Huala awmin RL. Kamlala chu pathumna a ni bawk a. Patea chanchin chhuina atanga a lan dan chuan kum 1920 vel atangin hla hi a phuah tan nia hriat a ni. Professor Siamkima chuan Patea hla a zirchiannaah chuan a hla zawng zawngah hian ‘Par’ tih hi hmun 40 a awm a, a hlate hi pangpar huan ang maiin ‘Par’ a tam a: Lawmna par, Bethlehem par, Kalvari par, Lalna par, Eden par, Lei pangpar, Saron par, Nunna par, Lal pian hun pangpar, adt. Nun thim leh beidawnthlak tak tak kar atanga pawha eng lam thlir tlat mi a ni tiin a sawi.
Lal Isua khan Lungngaih hapta chhunga a hun hman dan kha dik takin hre vek thei tawh lo mah ila hetiang hi ni bera hriat a niin hriatna tizautu atan tal pawh han tarlang ila a tha ang e:
Pathianni, April 10, 30 AD – Jerusalem atanga Mel 2-a hla Bethani khuaah a kal a, zan a riak a.
Thawhtanni, April 11, 30 AD – Temple hmuna Sumdawngte avang chuan Isua chu a thinrim hle a, an sumdawnna dawhkante chu a tihdarh sak a
Thawhlehni, April 12, 30 AD – Isua chungchangah Sakhaw hruaitute chuan inhnialna an nei a, Juda Iskariota chuan Isua a phatsan bawk a.
Nilaini, April 13, 30 AD – Isua chuan Sakhaw hruaitute chu a zilhhau a, rul ang maia that der tum angin a chhuah a, Olive tlang atang chuan Jerusalem khawpui chu a tah bawk a.
Ningani, April 14, 30 AD (6pm – 11:30 pm) – Isua chu a zirtirte nen Zanriah hnuhnung an kil ho a.
Ningani, April 14, 30 AD – (11:30 pm) – Zirtawp ni, April 15 (1:00 am) – Isua chu a zirtirte nen Gethsimani huanah an kal a, a chunga thil lo thleng tur a hriat lawk avang chuan a lungngai em em a
Zirtawpni, April 15, 30 AD (1:00 am – 1:30 am) – Isua chuan a chunga thil thleng tur chu hmachhawn turin a inbuatsaih a
Zirtawpni, April 15, 30 AD (1:30 am – 3:00 am) – Thubuai ngaihtuah vawikhatna; Kum 16 lai Puithiam Lal ni tawh Anna chuan Isua chungchang chu a hnial a.
Thubuai ngaihtuah vawihnihna; Puithiam Lal Kaiapha leh Sanhedrin-te chuan Isua chungchang chu an ngaihtuahin thi ngei turin an duh ta a.
Zirtawpni, April 15, 30 AD (3:00 am – 5:00 am) – Isua chu Kaiapha Lal Inah chuan hruai a ni a.
Zirtawpni, April 15, 30 AD (5:00 am – 6:00 am) – Thubuai ngaihtuah vawi thumna; Juda puithiam zawng zawngte, Puithiam Lalberte Lehkha ziaktute leh Sanhedrinte nen chuan Rom sorkar hnena Isua chu tihlum turin an ngen ta a.
Zirtawpni, April 15, 30 AD (6:00 am – 7:00 am) – Thubuai ngaihtuah vawi lina; Roelna hmuna ngaihtuah a nih hmain Rom Governor Pilat-a chuan ‘He mihring chungah hian fel lohna eng mah ka hmu lo e’ a ti a.
Zirtawpni, April 15, 30 AD (7:00 am – 7:30 am) – Thubuai ngaihtuah vawi ngana; Galilee ram pumpui awptu, Herod Ropui-a fapa Herod Antipas-a chuan Isua chungchanga zawhna tam tak chu a duh loh avangin rang takin Pilat-a hnenah chuan a thawn let leh ta a.
Zirtawpni, April 15, 30 AD (7:30 am – 8:30 am) – Thubuai ngaihtuah vawi rukna; Pilat-a chuan Isua chu chhuah mai turin a ngen nawn leh a, nimahsela Juda hruaitute chuan an hnial nawn leh bawk a. Pilat-a chuan Juda hruaitute hnenah chuan Isua chu taksaa tawrh theihna tur khawp hmu ngei turin a ngen ta a. Anni chuan Isua chu Kross-a khengbet ngei turin an ti a. Chu erawh Pilat-a chuan a dodal tlat thung a, a tawpah erawh chuan Isua chu tihlum turin thutlukna a siam ta a ni.
Zirtawpni, April 15, 30 AD (8:30 am – 9:00 am) – Pilat-a chuan Isua chu Tualzawl (Praetorium) hmuna hruai turin a sipaite chu a ti a, an sawisa a, an nuihsawh bawk a, chumi hnuah chuan Luruh hmun lamah an hruai ta a.
Zirtawpni, April 15, 30 AD (9:00 am – 12:00 noon) – Isua chu Kross rit tak an put tir a, Sipaite chuan talhfiakin an vaw pah reng bawk a.
Zirtawpni, April 15, 30 AD (12:00 noon – 3:00 pm) – Isua chu Kross-ah an khengbet a, darkar thum lai an khaikanin a awm a.
Zirtawpni, April 15, 30 AD (3:00 pm) – Isua chu a thi ta.
Zirtawpni, April 15, 30 AD – Thlanah an phum ta a.
Pathianni, April 17, 30 AD – Isua chu a tho leh a, a thih hnua hmuh theiha a inlanna hmasa ber a ni.