Daily Newspaper

Lushai Hill atanga Mizote Tihsual

19

C.Vanlal Ruaia. 9862569310

Lal Khawnbawl ten rorel dan an inrochun a, hnamchawmin engmah thiam an nei lo. Mizoram hi ngaihtuah chian chuan a manganthlak tak zet a. Tumah inmawhpuh theih a ni bawk si lo, kan hruaitute hi a hun laia fing ber an ni bawk thin si a. Mahse, mahni aia fing zirtirna/thurawn kan hnar kha a indem theih ang chu. Kan tihsual chu ram pum tana pawi a ni ta. Hmasial vang pawh a tih theih: Mizo te kan tawlh thluk zar zarna chu han sawi thuak ila:

1. Kum 1892 Chin Lushai conference kha English Secretary ho khan ngaihtuah chiang in Chin Lushai Hlawmkhawm kha an tihlawhchham lui a. A chhan chu nakin British-in a chhuahsan hun a, an duh thlang thei tura an dah reng duh vang a ni. (As Reid and J P Mills) + Chu an thil vawn (retrieve) chu Vai hoin vawi tam tak Excluded Area ho kha Assam Province-ah lut ve turin an bei thin a. Mahse Excluded Area-ah an dah lui tlat a ni. Kum 1926-ah Kulikawn pa ho khan Assam Governor-ah Assam Province-ah MLA neih ve leh Sailo lal an ninzia kha Superintendent kal kanin an lo thehlut ve a, Governor-in a rawn thawn let leh chuan, Kulikawn pa ho chu Lung in-ah an tan phah ta a ni. Politics lo sawi ve ngam vak a ni lo. A kal ngaiin Lalte rorelna hnuai ah Lushai hills kha a kal chho zel a. Second World War-a British-in Atlantic Charter an sign angin, kum 1946 atang khan India an chhuahsan tur chu an ti chiang tawh a. Mizo te pawh an hmakhua thlir turin Political Party hial din an lo phal sak ta a ni. Kum 1946-ah an phal ngai reng reng loh Mizo Union party pawh an lo din ta hial a

2. Mac Donald:
Hetih lai tak hian Mizoram awptu superintendent chu, Mac Donalda ICS Scottish palian tak mai a ni. Mac Donald chuan Mizote chu politics zia (ethics) zirtir a tum nasa viau a ni. Mizote Lal rorelna hnuaiah an awm thin avanga mipui Hnamchawmin rorelna Democracy lam phei chu an hriat loh avngin British type democracy Lal aiawh leh Mipui aiawha rorel dan zirtir a tum a. Chuta tang chuan an ram kal zel dan tur ram aiawhin thutlukna (Option) siam rawh se a ti a. Mahse Mizo Union te khan Assam Vai thamna Jorhat-ah Rs 20,000/- an lo dawn tawh bawk si avangin, (Issac Zoliana p85) Mac Donald chu an su lui ta a ni. Chuvang chuan, Beksak. (Bek a, ben rik sak) an dawng ta a ni. Mac Donald-a hnunga Superintendent Petera ICS erawh kha chuan Mizo Union chu Lung inah te a rawn khung ta nge nge a ni. He thil hi Thil pawi tak Mizote tih sual pakhatna a ni a. Hei hian Mizoram tan thil pawi tam tak a thlen ta a ni. Hei hian Inner line reserve te thleng hian a khawih pawi ta a ni.

ORDER NO. 2: Dt 13th May, 1904. It is hereby notified for the information of public that the rules for the management of the forests in the Lushai Hills passed by the Honorable Chief Commissioner of Assam vide secretary the Chief Commissioner’s No. 75 forest. 1776 – R. dt. Shillong 22 April. 1904 will take effect in this district from the date.
13th May,1904 – Sd. J. Shakespear, Major
Superintendent Lushai Hills

3. Advisory Sub Committee:
Kum 1947 April 17 chuan Advisory Sub Committee chuan Mizoram chu a rawn rim ta a. Mizo Union chuan India-ah Mizoram chu kum 10 hnua duh thlang fel tur (in good faith) in an luh pui ta a. Interim period kum 10 a lo ral meuh chuan, India chuan engmah ngaihtuah tumna a nei lo va; nge Mizo te a ngaichang zawk ni. Nagaland (excluded area ve tho) khan India Independent hma atang khan Independent a lo sual tawh a. India khan Mizo te kha a enthla nge ni, Development a awm lo va, kawng a awm lo va. Kum 10 a ral, 1959-ah chuan Mau a tâm a. Mizoram chu an tam, an rethei hle. Mipui chuan India rama hruai luttu Mizo Union ho chu an ngei tan leh der tawh a.

Mizoramin Mac Donald-a zirtirna an hnar avangin British an zalenna chhut chhiat saktu leh an mawh phurtu chuan a tinsan ta bawk si a. Mizo tualchher politician-te chuan engmah an thlir thiam bawk si lo. An rorel leh thuneihna pawh an hre thiam chuang lo. Rorel pawh an thiam lo (K.Lawmzuala) Kum 10 an thu tiam a ral hnu kum 9 lai an nghah leh hnu ah, Zalenna nei let leh turin, kum 1966 chuan Independent kan sual ve leh ta nge nge a ni. India sawrkar hi chuan Mizoram hel tur hi a hmu vek a. Eng thamah a ngai lo a nih hmel; emaw a lo rin lawk reng a ni thei. Assam Chief Minister B P Chaliha pawh Military Intelligent Eastern Command chuan an lo hrilh tawh reng a ni.

An han indo takah chuan Hnam rilru, la tuk zal loh, Sailo hun laia Pasaltha rilru pu khan Vai sipai chu an thisen pawn a ngam, an huaisen lutuk, Vai sipai hlau lo lutuk erawh an thih phah zawk thin a ni.

4. Union Territory:
Mizoram a buai reng chungin India sawrkar chuan kum 1971 ah NE Tlangmite State thenkhat pek nan North Eastern Area Reorganization Act 1971 (NEARA ) a siam a. Hemi rual hian Pawi –Lakher Regional karah Chakma Autonomous District Council a rawn piantir ve nawlh mai a. Mahse tualchher politician mai kan nih avangin kan che sual leh ta. A chhan chu kan politic hriat dan kha Lal Sailo zawh chiah a, Hnamchawm rawn lal tih dan INHMUN SEM ang zel khan; Lalna/ power duh vang a ni zel. Chakma District council an han piantir dan hi chu, a verther (sabotage) hle a ni, a ang lova, India pawh hian a hre reng a. A Indianise lui leh hram a ni. Mipui aiawh remtihna (plebiscite) pawh a awm lova. Mahse a mawh chu 1947-a kan thlan sual kha a ni. Bawrhsap, ICS meuhin mi, a thuawih lo luhlul kha, a ben chuan kan tisual ve tih a entir a. India kan zawm ta kha British chu an ngawi reng tawh a, a hre chin rual ute pawn an zuk pun ngam tawh hek lo. Indian politics chu bum theih chhung bum a ni mai. Chu chu “Indian politics reih rawih’ kan tih chu a ni. India-in Remna a sign-pui hi a buai duh viau vek a ni.

5. Memorandum chungchangah:
Kum 1986 June 30-ah Remna kan rambuai chungchangah Memorandum of Settlement (MOS) ziah a ni a. Hei pawh hi a Indian Politics leh reih rawih hle. Laldenga an chhaih an chhaih a. (Heng an tih dan tur hi Brig T Sailo khan Calcutta Convention neih dawn Feb. 1976 khan a hrilh lawk tawh a) Tihar Jail-ah an khung chiai phawt a, Remna an ziahpui a, beisei a sang thei tawh lo. Hengah pawh hian Pu Laldengah hian a demand chu a sang lutuk. Chung zinga Ramri (Inner line Reserve Forest 1875) te pawh demand zinga ah a tel tho. Mahse India a ni tlat a, kum 1946 Lushai Superintendent Peter-a Representation thehluh ang tho khan engmah a puitlin theih loh. An fet em avang hian kan tawlh thlu zar zar zel a ni.

i) Assembly Member 40 : Inremnaah India Constitution in State Puitling tan a, a sawi State pui tling chuan a tlem ber ah MLA 60 (a tam lamah) 500 ai a tam lo (Indian Constitution Art.158) tiin a sawi a. India Constitution Ruangam chhunga inbia ti siin, Constitution sawi loh angin an duhna laiah chuan an kalpui leh tho mai. Point dang tam tak High Court, University tih ang reng te hi chu Constitution-a awm sa, State ten an duha neih mai theih a ni a. Thil thar a ni hran lo. Rambuai thim chhah laia kan rama Chakma ram an piantirna kha an hre reng a, Minority humhalhna kha an rawn zep thar ta reng a ni. (memorundum no 9 ah khan)
ii) Quality hloh: Kum 1986 hnu lamah chuan Mizote chu Independent sual thlu leh (surrender) kan nih tawh avangin kan hma lama lo tlan tawh Naga nation erawh China chakna purin an in an la fight chho zel a (Anthony Shimray:Outlook Vol.4. No 5. China secret war) Anni pawh hi India lakah chuan a sak tauh tauh khawp mai. Mahse puih tlakah an ngai. Keini Mizote erawh chu kan chaurau tawlh tawlh a, Cachar Vaiin kan Bus leh kan Sumo te an han suam phawt a. Mizoram transport/zin motor-te sipai ven (Escourt ) ngai khawpin kan awm a. Huatna chang pawh kan hre chuang lo. Pride a bo tawh a; orderly rilru sukthlek kan ni tawh a, chhe tawh tak kan ni.

Hun a lo kal leh deuh a, Chakma ten kan ram an rawn luah tam telh telh a. Min bei na tial tial bawk a. Minority-ah kan lo tawt phah ni tur a ni, kan han inkhek a. Mahse kan ngam lo va. Danah kan thiam lo kan ti a. Chakmate tih dan chu, Tuikuk, kan Mizo Missionary zirtir chhhuak hmasa ten rawn entawnin kan ramah Autonomous District Council (ADC) an dil ve a. Chung avang chuan kan tual thu a chhia a. Min bei na ve ta viau mai, Syhlet Bengali pem khawm te nen an infuihpawrh kual a, kan inbei tawk ta viau a ni.

6. Ramri:
Khawvelah hian ramria thiamthu sawi nan Dan te Notififation te regulation te a sawt lova, a sawngsawhlawt bawk hek lo. A Sawt ber chu Chakna hma-chuan, (Might is right) tih leh luah (settled) a ni. Legal Maxim-ah (terra manua Occupanti conseditur) ram chu a luah hmasa bertu pe rawh, tihna a ni. Thinghlun piah tlangdungah Mizo hnahthlak tam tak a chinchang hria an tam. An ram luah kum 200 awm tawh te an ni. Mi tam takin Notification leh a dan an ziak nasa tawh a. A history chhuiin Mizote kan thiam a. Kum 1830 Cachar Lal Gobin Chandra fapa roluahtu nei lo, a thih avangin West Bengal lama an lo tih ang khan, British khan an belh a. Sap ho ten thingpui India ram an ching nasa tawh a. Cachar-ah pawh an rawn valh a. An thingpui ching hi tuman an tauh ngam lo. Mizo ten an Sai ram chhuahna a nih avangin an do a. Winchester thah tum phei chuan Lal intiam rual Lal 15 vel lai an ni. Sap naupang Zoluti pawh Mizo salah a tan phah a ni. Hei hi Ramri Evidence Proved British paw’n a hriatpui a ni a. Sawifiahna Interpretation atan hman tur a ni. Kum 1856 vel Record-ah chuan Cachar-ah Mizo an tam ber. (B C Allen +J P Mills)-ah a lang vek.

Kan Ramri hi engatinge kan humhalh loh? British-in min awp lai khan engmah Mizo Lalten an sawi ngam lo a. An duh loh zawng chu Lal pawh an ban mai a. Superintendent kha engkima engkim a ni a. Politics lam sawi a theih lova. Ramri pawh Mizo lal te thu loin J Shakespear-a’n a kham vek mai a. Kan Lal ten neitu (Patriot) taka ram an humhalhna kha Sapho khan an luahlan daih. Bawrhsap pawi sawi chu Lung in tanna a ni mai. Sap hun leh a hnu thlengin Lushai Hills Inner line Reserve Forest taxes chu lak a nih kan hria. Mizo Lalte power siam ngheh leh a nih hma si khan, Vai rimna leh Mizo Union tang rual avang khan Lal lalna chu a tlu ta ringawt mai a ni. Ramri han humhalh lehna hun an nei tawh lo.

Chung Mizo Lal rawn thlaktu chu Mizo Union an ni a. Mizo Union zingah Ch. Chhungan’ a rawn bei ve leh a, mahse hei pawh inbumna thangah a awk tawh a, a sawt tawh lo. India chuan a ngaihven duh chuang lo. Kum 1933 ramri Mizo tel ve lohna a siamin a rawn chhang daih. India sawrkar chuan, thuin tha takin sawi ila, kan thiamna reng pawh an ti duh lo va, hel phah hialin han sual ila; helnain hlawkna a hmu tur a ni lo, an ti leh si a. Hei hi Indian raih raih kan ti thin. Pu Ch Chhunga hian thudik tak a sawi a. Pu Laldenga paw’n ramria sapho Lungphum, pillar 46 chu a sawi lang tho; mahse an duh chuang lo. India rama lut tho tur engvanga hnial (tricky hnan) hram nge an nih. Assam sawrkarte nen min inbiaktir vel te hi chhuanlam der a ni a, vawikhat mah tih tawh loh tur a ni. A mawh chu Central India.

Thinghlun Thlam Hal:
Assam lamin Kan in an rawn hal a, min rawn hal dan pawh min tham lo hle, media an hruai a, huan an sam te, an in hal thlalakte, an sakhmel nen lam an vawrh darh a. Kan sepui ruah tuar char char mai a ni. Mahse ralkhat thlir (Aerial view) chuan Assam ram ni si, engatinge an hal? Engatinge an sam? Engatinge Mizo chuan an luah? Luah pawh ni se India citizen an nih chuan khawiah pawh an awm thiang si? Sual lian tak mai robbery act, kum tam tak lung in tanna tur chi a ni. Mizote kha kan zaidam hle mai nge? Kan at vang zawk em ni? Kan lo tin uaih a kan vaw leh ngam si lo (the wild Goose chase) Chawngthu lungchawi an tih ang vel kan ni. Lo kap let phung pawh ni ila, khawvel hian sawi tur a nei lo. Chakai pawh a kaw tawpah a tang thin tih a ni a. Danah tualthah chungchangah pawh, a va chim thin rim dan (degree of provocation ) a san viau chuan, kha kha kan insawifiahna tur a ni mai. Kan lo kah chiah chuan Central a inrawlh vat ang. Central ban-pharna hnuaiah tih zelna chance a awm tawh lovang. Kan chance tha hlauhin kan hek leh hlak thung. Assam-in an duhna chin boundary chu Central Force-in an thut ta hmiah a. Kan Mizo IR tal hi chuan luah nghet sauh sauh se. Kan theih tawk a ni.

Lalna hi Pathian anna ber a nih avangin:
Mizorama party sawrkar apiang ten India rama awm a thatzia thu an sawi thin ang. A lal apiangin an sawi ang a. An sawi uar zel ang. Independent pawh a tha lo zawk, enge kan ei ang? an ti thin a. Mizote kan inhruai sual nasa hle. Zalenna aia ropui khawiah mah a awm lova, tih hi hriat zawk tur a ni. Kum 5 term-ah an lal em em ang a, sum hmang zo vek mah se, entir nan, RBI atangin kum 10 chhung rulh tur puk ta se, a term lehah a tlak chuan a hnunga lo lal leh turte phurrit a ni mai a. Chung chu mipuite tax chawi vek tur a ni. Chutiang zelin leiba inrochun a ni kan buaipui. Hetiang hi an ni chho ta vek niin a lang. India ram hi a fel fai lova a buai a. Politics pawh a nih angin a kal tak tak ngai lovang. A chhan chu A Constitution hi a chingchivet a, eg. Unbailable ti na na na a, bailable a siam theih tlat te, Freedom of speech (Art 19.) a taka han hman dawn a, CCS Conduct Rule-in a phuar leh tlat si, ’tiang hi a tam mai. Chuvangin Hnam Survive tur chuan a dan, a dan thlir chuan engmah a tih theih loh. India ber zawk pawh hi boundary-ah chuan a buai ber zaw mah a ni. India hian Non Violence a sawi mawi a, mahse thu mai chuan a effective lo va. Economic blockdge te a tangkai thin… Constitution a fel loh chuan, engmah a fel thei lo. Naupan laia “The longest Constitution of the world” tih kan lo zir thin te, Dan sei ber kha a tulna a awm lo va, thil tha zawng zawng lakkhawm a theih lo va. A inkawlkalh kual mai mai a ni.

Tichuan kan ram chu politics awmzia (sense) hre miah lo khan Democracy-in kan kal chho ta. Engtin nge ram roreltu tha i beisei reng reng. Kan politician neih chhun Bri T Sailo kan hai tlat bawk si. A thih hnuah a policy kan han hrechhuak dawn chauh a. Mahse tih loh ai chuan a tha tho e.

A siam that Dan tur:
A siam that dan tur hi tam tak chuan a khal el-awl kan ti mai thei a; mahse, kei chuan pur tur dang ka hre lo.

1) India ramah kan lut tawh a, kan chhuak thei mai mai tawh lo, duh hle mah ila. India hian kan independent sual hma ai khan kan chak lohna te hria in, min hre chiang/ngam tawh zawk; kan Lut nghet tawh bawk. Ram hma ngaia rinawmna, taihmakna, dikna nena ram tana mi dik kan thlan chhuah a ngai a ni. India pawisaa hna thawh that a, zah awm, mi zah tlakin.

2) Mizo ten kan nihna rilru put hmang (Indigenous attitude) paih boin Christian Ethics seng luh kan tum a. A ram leilung-season leh environment a danglam chuang si lo va. Sik leh sa phei chu pipute hun ami reng a ni si a. Christian zirtirna khan Balkan State hnam luhlul ho zia an rawn keng a, chu chu martar (Martyr) an ti mai a, Muslim ho chuan Jehad an ti thung a. Ngaihdamna lam leh thuhnuairawlhna a rawn kalh a, Tlawmngaihna phei chu kan hriat loh hlanin a rawn kalh ran a ni. Chuvang chuan kan luhlul a, Martar thuthlung hrin pawl hrang hrang tiin huaisen takin Baptist, UPC, Salvation, Seventh Day, Presbytarian, etc tiin kan rilru zawng zawng pein kan vawiin ni ngaihtuah si lo hian chatuan ram thih hnu chiaha hriat tur ah, ngaihtuahna zawng zawng kan dah thin. Kan vawiin ni hi ngaihtuah tho tur a ni. Chung zawng zawng aiin Mizo Ethos Pipu nun mawi leh Tlawmngaihna Aia Upa zahna te chawi san, lehkha thiam leh hna chelh sang apiang mai thu lovin Aia upa zah nachang hriat inzirtir leh te, pipute huaisenna At-Huai tih sak loh a, hausa thar thut thawhlawm Kohhranin hnar ngama Inkhawmpui nikhuaa incheina sang lutuk hian thenawm khawveng nei lo zawkte rilru a ti hah tih hriat te, Sunday Sikul leh Inkhawmnaa kan thian ten Rs 20/50 an thawh laia Rs 500/2000 note lo thlak te hi vantlang nun ti hrehawmtu a ni tih hre ve tawh ila.

3) Kan Chang thlan tur :
Jacob 4:17 “Miin thil tha tih tur hria ti lo chu a tan sual a ni”:

He Pathianthu châng hmang hian dik lo taka thil ti te, nui ver ver chungin hrilh bawng bawng tur a ni. Mi a eiruknaa inhmangte hi, i harh chiang lo a nih kha, tiin aw zaidam takin hrilh siah siah a, ben harh mial mial tur a ni.

4) Mi sualnaah lo va inrawlh suh, i thlarau mawh a ni lo: tih chang hi dah that hmak thung tur a ni.

5) Dignity and Labor Campaign: Hei hi pawlah inzirtir ni se. Dignity hnuaiah hian taimakna, rinawmna leh dikna a awm .

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy