Lynyrd Skynyrd original member ten mual an liam zo ta
Guitarist Gary Rossington, kum 71, chu an rama March ni 5 khan a thi a, ani hi Lynyrd Skynyrd original member zinga damrei ber niin, tunah hian an band-in tour neih tumin an inpuahchah mek nghe nghe a ni.
Gary Rossington hian a hriselna lamah insawiselna neuh neuh a neihna hi a rei ve tawh ang reng a, 2010 vel atang khan lung (heart) lamah insawiselna a nei tawh a, band tour-ah pawh a inlan theih loh chang a awm nual a, heti chung hian tuna a thihna chhan hi puan a la ni lo.
2016-a Billboard-in an kawmnaah a nupui Dale Krantz-Rossington (a nupui hi Skynyrd back-up singer a ni) nena an album Take It on Faith chungchanga an kawmnaah Rossington chuan a hriselna lamah neuh neuh nei ve tawh mah se rimawi khawvel chu chawlhsan mai a tum loh thu sawiin, chawlhsan ai chuan mual liampui thak pawh a thlang zawk tih a lo sawi tawh a, “Ka thisenah a awm tawh? Guitar perh thin pa upa tawh lam ka ni a, hetianga perh thei tur hian darkar 10,000 chuang kan lo bei ve tawhy a, kan hmangaihna zawng zawng kan hlan. Chuvangin kan seh tawh lak laka, thlah leh mai mai thei a ni tawh lo. Chawl ta ila eng nge ka tih ang? Sangha man te hi nuam ka tih zawng a ni a, mahse, chutiang engtia rei nge ka tih peih ang? Chuvangin, tuna ka thil tih lai hi tih reng mai ka duh zawk a ni,” a ti.
Gary Rossington 1964-a Jacksonville, Florida-a an dun Lynyrd Skynyrd original member zinga dam awm chhun a ni tawh a, an band hming hi chu 1970-a an put tan a ni a, Robert E. Lee High School-a physical education zirtirtu strict zet mai Leonard Skinner hming atanga an lak a ni. Skinner hian mipa samsei a ngaithei lo hle mai a, Rossington pawhin school a chawlhsan phah hial a ni.
An band debut album Lynyrd Skynyrd chu August 1973-ah an tlangzarh a, he album-a an hla ‘Free Bird’ chu an Skynyrd signature song a ni zui ta a, an hla dang “Sweet Home Alabama”, “I Ain’t the One,” “Things Goin’ On,” “Don’t Ask Me No Questions,” “Gimme Back My Bullets” leh “What’s Your Name” te pawh an larpui hle a ni.
October ni 20, 1977-ah Greenville atanga Baton Rouge an pan laiin an thlawhtheihna chuann a a chesual a, band member pathum- Van Zant, guitarist Steve Gaines leh a farnu, backup singer Cassie Gaines bakah an assistant road manager Dean Kilpatrick leh pilot pahnih te an thi a, Rossington leh midang te chu hliam natak tuarin an dam chhuak a ni.
1982-ah Lynyrd Skynyrd a din thar leh a, chuta tang chuan chawlh nei lovin an ding tlang ta a, studio album pakua an tichhuak leh tawh bawk a ni.
Lynyrd Skynyrd original member ten mual an liam zo ta
