Lyon boss Blanc an petchhuak

Ligue 1 table mawngphaha a team enkawl lai a tanpui tlat avangin Lyon chuan an head coach chhawr lai Laurent Blanc an ban fel ta nge nge.
Ti hi chuan, Lyon boss ni chunga game a enkawl hnuhnunber chu Paris St-Germain an mikhual tuma 1-4-a an tlawm tum kha a ni ta a, Ligue 1 table-a a hnuai ber an luah ngheh zel avangin team thuneitute’n an manager lakah rinna an nghat zo ta lo a, inhriat-thiamtawnnain inthen an titlu.
Lyon hian season thara an league game hmasa pali atangin point khat chiah an la hlawhchhuak zo a, league kal laia goal difference chhe ber an kawl bawk.
Manager thar an neih hma atan technical director Jean-Francois Vulliez chuan first team a enkawl rih dawn a; Vulliez hi Lyon academy hmingthang tak enkawltu a ni.
An ban tak kum 57 mi Blanc hi nikum October thla khan Lyon manager atan lakluh niin, season liamta khan a team enkawl chu pasarihna a nihpui a, Ligue 1 atangin European tournament an khel pha lo chiah chiah.
Lyon hi 2015-16 season-a PSG a chhuahsan hnua France rama team enkawl leh hmasakber niin, Qatar ramah a nghet loin Al Rayyan a enkawl zawk thung.
Lyon a enkawl hnuah Blanc ho hian game tina point 1.53 zel hmu ang niin, chu chu kum 25 chhunga Lyon manager nghetin point a hmuhchhiat ber tum niin, an coach hlui dang Sylvinho ho khan an chechhe tawh bawk a, mahse, ani khan league kua bak a khelhpui hman lo thung.
PSG manager a nih chhungin Blanc hian Ligue 1 title pathum hlawhchhuak tawhin, Bordeaux tan league title pakhat a kalpui tawh bawk a, Lyon-ah erawh a hlawhtling zo ta lo a ni.
Boss thar tur inrinsiakna a intan chhoh laiin kum 48 mi Brighton leh Chelsea manager hlui Graham Potter chuan Lyon sawmna a hnar niin media lamin an tarlang.
He hmunruak luah tura sawirik zingah kum 45 mi Gennaro Gattuso hming a langsar a, kumin January thlaa Valencia a chhuahsan hnuah Italian coach hian hna vawn lai a nei leh ta lo.