Mara Autonomous District Council Fur thutkhawm chu Thawhlehni khan MADC Session Hall-ah tan a ni a, Nilaini hian chhunzawm a ni ang.
MADC session kaihruaitu chairman N Viakhu chuan session chhunga Panel of Chairman atan N Beihu leh HC Biakcheuva te ruat an nih thu a puan hnu ah New Siaha bialtu MDC H Hrangchuanga, kumin June 1-a boral ta sunna hun hman a ni. Chairman-in an chanchin tlangpui a sawi hnu ah eptu lam leh ruling atangin H Hrangchuanga chanchin leh an uina thu an sawi a, minute khat ngawirenga dingin a sunna hun hman a ni.
Zawhna leh chhanna hun hman nghal a ni a, ziaka chhan chi zawhna 4 chu House dawhkanah dah a ni a, kaa chhan chi zawhna 8 chhan a ni bawk.
Chawhnu session-ah official bill pahnih, The Mara Autonomous District Council (Town Police) Bill 2023 leh The Mara Autonomous District Council (Town Council or Committee) (Third Amendment) Bill 2023 chu pharh a ni a. Official Rules panga House ah pharh a ni bawk.
MADC Fur thutkhawm nei
