Mizoram State Election Commissioner Laima Chozah chuan Mara Autonomous District Council hnuaia Village Council 99-te Inthlanpui neih hun atan April ni 18, 2023 ruat a nih thu nimin khan a puang.
VC inthlan atan hian March ni 30, 2023 thleng nomination a file theih a, March ni 31-ah scrutiny neih a ni ang a, April ni 3 thleng inhnuhdawhna hun hawn a ni ang. VC inthlanna hi April ni 24, 2023-ah zawhfel vek tura ruahman a ni.
Laima Chozah chuan inthlanna fel fai leh muanawm neih a nih theih nan inthlanna buaipuitute, political party-te, media, NGOs leh mipuite Tawiawmna a ngen a. Mipui duhthlanna kaltlanga tualchhung inrelbawlna Tha tak neih zui a nih zel theih nan theih tawp chhuah Theuh turin Mara Autonomous District Council huam chhunga khaw 99-a mipuite a sawm a ni.
State Election Commission chuan inthlan a buatsaihna a mawhphurtu tupawhin duh sak bik emaw hlauh bik emaw an neih a rem ti lova, a lai thei ang bera hnathawk turin a ngen a ni. MADC huam chhungah hian vote nei thei mi 43,120 awmin mipa 20,794 leh hmeichhia 22,326 an ni.
VC inthlan hun puan a nih rual hian Model Code of Conduct (MCC) pawh hman nghal tura puan nghal a ni a, MCC hian VC inthlan result puan thleng a huam dawn a ni.
MADC hnuaia VC inthlan hun tur puang
![](https://theaizawlpost.org/wp-content/uploads/tap_logo-min-large.jpg)