Madonna chuan a la chuai thei lo tih lantirin Celebration Tour a neih khar nan May ni 4 khan Copacabana beach, Rio de Janeiro-ah free concert a nei a, he concert-ah hian mipui maktaduai 1.6 chuang an pungkhawm!
Queen of Pop hian concert-a mipui tam berna record a siam a, a hmaa hetiang record siamtu chu 2006-a Rolling Stones concert kha niin, Madonna hian record thar a rawn siam ta a ni.
Madonna concert hrim hrimah tun hi mipui maktaduai chuangin an chhim vawi khatna a ni a, a hmaa Madonna concert-a mipui tam berna chu 1987-a Parc des Sceaux, Paris-a a concert niin, hemi tum hian fans 1,30,000 an pungkhawm ve thung.
Tun tum Brazil khawpuia a free concert hi Itau bank-in an sponsor a, 2012 hnua Brazil-a Madonna-i’n show a neih lehna hmasa ber a ni. Ticket hi concert neih dawn ni a a hmun thleng hmasa sa te hnenah a thlawna pek an ni. He concert-ah hian Madonna pawhin a hla hlui te pawh a hrut leh nual a ‘Like a Virgin,’ ‘Like a Prayer’ leh ‘Into the Groove’ te pawh a set list-ah a telh a, special guest Anitta leh Pabllo Vittar ten stage-ah an tawiawm bawk.
Rio de Janeiro hi Madonna-i’n Celebration Tour a neih kharna a ni nghal a, he tour atang hian dollar maktaduai 225 chuang hmuchhuak turin an chhut. A tour hi nikum October khan London-ah tanin, Canada, US leh Mexico te pawh a hrut kual hman nual a ni
Madonna-i’n Brazil-ah record siamna khawp free concert neiin tour a khar
