Madrid kalkawnga Nadal daltu Lehecka

Madrid kalkawnga Nadal daltu Lehecka
World number one hlui Rafael Nadal chuan vawinga a champion tawhna Madrid Open-ah round of 16 a paltlang zo ta lo a, Thawhlehni zanah straight sets hmangin Czech Republic player hriat hlawh lem lo Jiri Lehecka a hneh lo a, kumin kum tawpa chawlh a sawirik vuai vuai tawh avangin tun kha a Madrid Open match hnuhnungber ni tawh tura ngaih a ni.
Kum 37 mi Nadal chuan a ropui thinna muala a kirleh chungchang sawiin, Madrid Open-a a inlan tawpna tur a nih tawh avangin a tan hnukulh deuh teuhna chawlhkar a nih thu a sawi a, 7-5 6-4-in tlawm mah se a hlim hle tih a sawi a, a career-a hlawhtlinna mual pakhata a inlan leh thei a lawmzia leh a tennis zingkawnga an puihna zawng zawngah lawmthu a sawi nghal bawk.
Quarter-final lut zo ta lo mah se Madrid Open huaihawttute lam atangin he tournament-a a hlawhtlin tawhna video hlimthla chu amah chawimawina’n mipui en theih turin an phochhuak a, chawimawina leh hriatrengna trophy an hlan tel bawk.
A nupui fanaute’n mipui zing atangin Nadal-a chetla hi an lo thlir ve reng a, a puala hun hman a nih zawhin fiamthu a thawh zeuh a, “Ka puala an thiltih hi chu fiamthu a ni, a chhan pawh nakkumah ka lokir leh dawn a,” a ti.
Czech 30th seed laka chak zo ta lo 22-time Grand Slam champion Spaniard khan Manolo Santana Stadium-ah a chipuite thlawp a hlawh tha ngang mai a, mahse, darkar hnih leh minute thum chhungin hnehna a sualchhuak zo ta lo. Hliam avanga thlathum a bawksawp hnua April thlatir Barcelona Open-a kirleh Nadal hian a ropui chungchuanna French Open-ah kumin hian a inlan thei dawn em tih a sawichiang ngam lo reng a, mahse, Madrid-ah vawithum ngawt a chakzawn tak avangin a tawpna atana French Open khelh leh a tumna kawngah inrintawkna a nei sang sawt tura beisei a ni.
Roland Garros-a tum 14 ngawt champion tling tawh leh clay grand slam title la hnem ber record siam mektu Spaniard hian nikum khan hliam avangin a tournament ngainatber hi a khel thei lo a, kum 19 chhunga Roland Garros-a a inlan loh vawikhatna a ni nghe nghe.
Kum khat chhunga grand slam tournament pahnihna French Open hi tun May ni 26 atanga khelh tan tur a ni.
Nadal hnehtu Jiri Lehecka-a tum leh tur Russian third seed Daniil Medvedev chuan fourth round inkhel dangah 7-6 (7-3) 6-4-in Kazakhstan player Alexander Bublik a hneh ve bawk.
Alcaraz tlang hram
A zawna Madrid Open title vawithum la thei hmasaber nih tuma tournament hmachhawn mek Carlos Alcaraz chuan Thawhlehni zan inkhel dangah nikum final-a a hneh hnu Jan-Lennard Struff a sual tawk hle a, dinhmun him lo taka ding deuh reng chungin darkar thum dawn hnuah 6-3 6-7 (5-7) 7-6 (7-4) hnehna nen harsa takin last-eight a lut thei hram!
Defending champion Alcaraz hian German 23rd seed lakah home supporter rual puihna pawh a chhawrtangkai zo meuh lo a ni ber a, deciding set tie-break khelh a ngai hial a ni.
World number three Alcaraz hi Madrid Open hnuhnung pahnihah a champion a, Spanish khawpui tournament-ah hian match 14 a chak zawn tling chiah a ni.
Kum 20-a upa la ni leih leih chauh Alcaraz hian Russian seventh seed Andrey Rublev a tum leh dawn a, Thawhlehni zan inkhel dangah Rublev hian Dutchman Tallon Griekspoor lakah 6-2 6-4 hnehna a chang.
Italian top seed Jannik Sinner pawhin kumin chhung bika a title palina tur beisei zui turin hnehna a chang kal zel a, last 16 inkhel dangah 5-7 6-3 6-3-in Karen Khachanov a paltlang.
Australian Open champion Sinner hian last-eight inkhel pakhatah Norway player chetha mar kal mek Casper Ruud hnehtu Canada player Auger-Aliassime a hmachhawn leh ang.
German fourth seed Alexander Zverev thung chuan kum 2021-a a lo champion ve tawhna chhunzawm turin round sang zawk a chuangkai zo lo a, 6-3 6-4-in Francisco Cerundolo lakah a tlawm.
Argentine 11th seed Cerundolo hian straight set hmanga Hubert Hurkacz of Poland paltlangtu American 12th seed Taylor Fritz chu quarter-final lamah a su zui leh ang.