Daily Newspaper

Mahatma Gandhi nena khaikhin hlawh Prashant Bhushan

15

Pandemic laia Indian te ngaihven hlawh ber pakhat chu lawyer-activist leh Supreme Court tena court chhunga an inbeihna nia sawi a ni.

Kar kalta khan WhatsApp India-ah Richard Attenborough a film siam Oscar Award dawng ngat Gandhi tih one-minute clip chu nasa taka share-in a awm a.

He film-ah hian Mahatma Gandhi lema chang Ben Kingsley chu British judge te hmaah dingin hearing neih kal zelah British judge te chiaina a lang a.

Gandhi chuan ram bial khat chhuahsan a duh lo va, bail-a chhuak turin bond man pek a duh hek lo. Judge-in ‘Jail-ah tan i duh em ni?’ tia a zawhna chu, “I thu thu,” tiin Gandhi chuan a chhang a ni.

Chutiang deuh chu Indian Supreme Court-ah tun hnaiah a thleng nia ngaih niin, judge pathum awmna bench chuan lawyer hmingtha leh lar Prashant Bhushan chu judge te a sawi sel avanga ngaihdam dil turin an ti a, mahse, ngaihdam a dil duh lo.

Bhushan chuan judge te a sawiselna chu ‘thuk taka a ngaihdan’ a nih thu sawiin ngaihdam a dilna chu ‘depde’ leh ‘ka chhia leh tha hriatna kalh’ tia sawiin ngaihdam a dil duh lo.

Lung In tantira vauna chungchangah Mahatma Gandhi thusawi, “Zahngaihna ka dil lo. Inkhawngaihna ka dil hek lo. Court-in hremna min pek ang chu lawm takin ka pawm mai ang,” a tih chu a sawi lang a.

August 14 khan court chuan Bhushan chu court tihmingchhia tia thiamloh chantirin judge te sawiselna pahnih a post avangin ‘cheng khat’ (one rupee) chawi turin a ti a.

Judge pathumna bench chuan kum 63-a upa Bhushan an 15 September hmaa cheng khat a chawi lo a nih chuan thlathum lung In a tang ang a, law practice thei lovin kum thum hremna a tawk bawk ang, a ti a.

Bhushan chuan pawisa chawi tura an tih chu a chawi tur thu sawiin mahse court thupek khin theihna leh ennawn leh tura ngenna kalpui thei turin dikna a neih thu a sawi thung.

“Dan ang thlapa ka chawitura min tuk pek chu lawm takin ka pawm ang,” tiin thuchhuah a siamah a sawi a, “He thupek hi ka zawm dawn a, ka chawi tur pawh ka chawi ang,” tiin a sawi.

Bhushan chuan thutlukna a siam chu a ‘tihdikloh pawmna’ a nih thu sawiin mahse ‘freedom of speech’ leh ‘judicial accountability’ a duhna avanga a beihna chuan India a fanchhuak a, ‘defender of democracy’ leh ‘hero of our times’ tia chawimawia fakna a ri chuah chuah a, Mahatma Gandhi nena khaikhin a nih phah hial.

Bhushan leh Indian judiciary inbakkaihna hi kumin June thla atanga intan niin amah follow tu 1.6 million te hmuh tura a tweet pahnih siam vang a ni.

A tweet pakhatah chuan Chief Justice of India Sharad Bobde an Hbike man to Harley Davidson a kapkalak lai thlalak a pholang a. Pakhat zawkah chuan tun hnai kum ruk chhunga Chief Justice pali te chetdan a sawiselna a ni thung.

Indian law minister hlui fapa Bhushan hi India rama lawyer zahkai berte zinga mi niin human rights activist lar tak public interest atana a nun leh thiamna hmangtu a ni. Tun hnai kum 35 chhungin sorkar eirukna, environment, court-a langtlang leh human rights issue te beih nan a hmang a. Report pakhatah phei chuan a hun 80% chu pro bono work, mirethei leh tlabal te chhan nan a hmang an ti.

Tuna a thubuaiah pawh India top lawyer tam takin an tan a, India ram pumah Bhushan tan avanga lungawilohna a nasa hle bawk.

Retired judges, lawyer leh eminent citizen 3,000 dawnin thuchhuah intawm siamin Bhushan chu court zahlo tia sawi chuan ‘Court sang ber hnathawh danah mipui tena zalen taka sawiselna an neihah nghawng tha lo a nei thei’ an ti.

Mi sang tam takin social media kaltlangin lawyer-activist thlawpna an sawi chhuak a, mi za tam tak ten kawtthlerah an lantir bawk.

Supreme Court-in Bhushan hremna thutlukna a siam ni hian court pawnah mi tam tak an pungkhawm a. India khawpui hmun dangah pawh lawyer rualte chuan Bhushan thlawpna an lantir bawk.

Supreme Court-in Bhushan hremna a chhiar chhuah meuh chuan amah thlawptute chuan ‘moral victory’ tia sawiin pawisa cheng khat chawitir chu judiciary in hmaiphih nana an tih mai mai an ti a. Dan lam thiamte chuan Apex Court thutlukna chu fak thungin, intihbuaina nasa zawk thleng thei mawi taka danna an ti thung.

Bhushan chuan Supreme Court hnena a chawitur cheng khat a a lawyer hnen atanga a dawng lai thlalak pholang thungin ‘lawm takin ka pawm’ tiin a ziak thung.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy