Thawhtanni khan Fifa Best Award 2023 an semchhuak a, Argentine Lionel Messi hun a la kal tluang zel a, Fifa men’s player of the year trophy a dawng leh.
Tarlan tawh thin angin, Fifa semchhuah award hrang hrangte hi Fifa website kaltlanga national team tin coach leh captain-te bakah journalist leh fans vote atanga thlanchhuah a ni thin.
National team captain zinga Messi vote-tu langsarte chu Harry Kane, Mbappe, Mohamed Salah, Andy Robertson, Aaron Ramsey leh Luka Modric-te niin, Ilkay Gundogan leh Casemiro-te’n Haaland an vote a, Argentina captain Messi chuan amah a in vote nalh!
Montserrat skipper Lyle Taylor chuan Arsenal midfielder Declan Rice thlangin, Russia captain Georgi Dzhikiya chuan Georgia leh Napoli winger Khvicha Kvaratskhelia a duhsak a; Portugal boss Roberto Martinez chuan tuna Saudi Arabia club Al Nassr lama kal ta ex-Inter Milan midfielder Marcelo Brozovic tan a vote a hlan thung.
England boss Gareth Southgate chuan Haaland a vote a, Wales manager Robert Page leh Scotland coach Steve Clarke-te’n Messi an vote.
Fifa Best Award hian dan tlangpuiin calendar kum khat hi a huam thin a, season khat chhunga player-te chet dan ena thlan thin Ballon d’Or award nen chuan a danglam deuh. Messi chu Ballon d’Or award dawng hnember niin, tum riat dawng thei awmchhun a ni.
Season liamta khan Norwegian striker Erling Haaland chuan Manchester City kutah trophy lian pathum a luhpui a, mahse, Balon d’Or a ni emaw footballer chawimawina thlan chi reng rengah Inter Miami forward Messi vanglai la kal vung chu a hmakhalh zo rih tlat lo a, tuntuma Fifa Best Award-ah pawh chuti leh tho chu niin, Argentina captain hian mipa best player thlannaah Paris St Germain forward Kylian Mbappe a hmakhalh tel bawk.
Kum 2022 pawha men’s award lo dawng tawh Messi hian Major League Soccer (MLS) team Inter Miami a zawm hma khan PSG tan Ligue 1 title hlawhchhuakin, an ram chu World Cup-ah a champion-pui bawk a; a club thar Inter Miami chu an club history-a an trophy hmasaber lakpuiin, MLS leh Mexico top flight Liga MX club-te inelna 2023 Leagues Cup title a lakpuina kawngah goal 10 khungin, Fifa award thlannaah pawh a langsarber a ni zui ta zel a ni.
Kum 36 mi ni tawh chunga Fifa chawimawina sangber la dawng thei Messi hian kum 2023 tir lam kha Paris St-Germain thuam inbel chungin a la tan hman a, June thlaah MLS club Inter Miami a zawm a; tun hi kum 2016-a he award kalphung an tihdanglam hnua best men’s player award a dawn vawithumna niin, kum 2019 leh 2022 khan a lo dawng tawh a ni.
Season liamta khan PSG-in French Ligue 1 title an lakna kawngah goal kua khungin, United States a thlen hnua tournament thar Leagues Cup hmasabera Inter Miami a champion-puina kawngah game sarih atangin goal 10 a thawh leh bawk.
Tarlan tak angin, Messi el pha ber tura ngaih Haaland chuan season liamta khan City chu Premier League, FA Cup leh Champions League title lakpuiin, 2022-23 season inelna hrang hrangah belhkhawmin match 53-ah goal 52 a tilut tling a; point hmuh zatah Messi nen intluk mah se national team captain hrang hrangte first-place vote-ah a hniam zawk a, Argentine hnuaiah a awm phah leh ta rih a ni.
Kum 23 mi Haaland hian season liamta khan record siamin season khat chhunga Premier League goal khung hnem ber (36) a ni a; 2022-23 bikah khan inelna hrang hrangah belhkhawmin City tan goal 52 a thun a, kha pawh kha an club record a ni nghal bawk.
Heti zat goal zinga 28 hi World Cup zawha a thun niin, nikum August ni 20 hma khan tun season kal laiah hian goal hnih a thun leh hman bawk.
Tuntum mipa thiamber award (men’s Fifa Best Award) leh goal thun mawi ber tana an hlan thin Puskas Award hi December ni 19, 2022 atanga August ni 20, 2023 chhunga an khelh dan (chetthat dan) atanga teh niin, Qatar ram World Cup final khelh zawh tuk atanga chhiar tan a ni.
Buk zinga langsar dang France captain Kylian Mbappe khan Messi nena tlarhma lama thawkdunin season liamta khan PSG tan Ligue 1 title a hlawhchhuak a, a zawna a vawingana atan Golden Boot a dawng zui bawk.
Kum 25 mi hian French club tan award tehkhawng hun chhung khan goal 18 a tilut tling.
Kumin Fifa Best Awards sem inkhawm hi London khuaa Hammersmith Apollo-ah nghah niin, player tha ber ber ni mek leh lo ni tawh thin an tel thahnem hle a ni.
Team of the year
Manchester City player paruk lanna men’s team of the year luahtute chu Thibaut Courtois (Real Madrid), John Stones, Kyle Walker, Ruben Dias, Bernardo Silva (all Manchester City), Jude Bellingham (Real Madrid), Kevin de Bruyne and Erling Haaland (both Manchester City), Kylian Mbappe (Paris St-Germain), Lionel Messi (Inter Miami) leh Vinicius Jr (Real Madrid)-te an ni.
Coach tha ber
Best Men’s Coach award chu lawmman sem zana an award thehchhuah hmasakber niin, City head coach Pep Guardiola chuan Luciano Spalletti leh Simone Inzaghi-te hmakhalhin coach tha ber lawmman a dawn.
Spaniard Guardiola hian season liamtaa City enkawl chunga Treble a hlawhchhuah hma 2008-09 season-ah khan Barcelona chu trophy lian pathum a lo lakpui tawh bawk a; tuntuma coach tha ber lawmman a dawnte hi nominee-a lang ve dang pahnih Inzaghi leh Spalletti tan a hlan.
Inzaghi hian Inter Milan chu 2023 Champions League final luhpuiin, City lakah sikhat faiin an tlawm ta kha a ni a; Spalletti hian kum 33 zet an nghah hnuah Napoli chu Serie A title a lakpui ve bawk.
Hmeichhe lama coach tha ber atan England coach Sarina Wiegman thlan niin, Best Women’s coach prize dawngtu Wiegman ho hian England chu World Cup final-ah sikhat faiin Spain lakah an tlawm a nih kha.
Award dang
Women’s World XI-ah Lionesses (England) player pasarih ngawt langin, chu’ng zinga pakhat Mary Earps chuan Best Women’s Goalkeeper Award a dawng a; mipa lama goal-veng tha ber atan Brazil leh Manchester City keeper Ederson thlan a ni ve thung.
Ederson hian goalkeeper award dawng thei tura chhawpchhuah ve dang pahnih Real Madrid keeper Thibaut Courtois leh Al Hilal goal-veng Yassine Bounou a hmakhalh.
Goal mawi ber thuntu hnena an hlan thin Puskas Award an tih chu Hungarian legend Ferenc Puskas hming chawia phuah niin, he award hi football chanchin sawitu (pundit)-te thlan mi niin, Brazil second-tier club Botafogo tana pen 25 vel zeta hla atanga overhead kick pui tak khungtu Brazilian Guilherme Madruga kuta hlan a ni.
Brighton midfielder Julio Enciso chu he award dawng thei tura thlanchhuah pathum zingah telin, nikum May ni 23-a Seagulls-in 1-1-a an mikhual Manchester City an inhnehtawkpui tuma a long-range goal kha award a dawnpui zo ta lo a ni.
FIFA THE BEST AWARD 2023 DAWNGTUTE
The Best Fifa Men’s Player
Lionel Messi, Inter Miami, Argentina
The Best Fifa Women’s Player
Aitana Bonmatí, Barcelona, Spain
The Best Fifa Men’s Coach
Pep Guardiola, Manchester City
The Best Fifa Women’s Coach Award
Sarina Wiegman, England
Puskas Award
Guilherme Madruga, Botafogo-SP, Brazil
The Best Fifa Men’s Goalkeeper
Ederson, Manchester City
The Best Fifa Women’s Goalkeeper
Mary Earps, England, Manchester United
FIFPRO World XI
Mipa
Goalkeeper: Ederson
Defender: John Stones, Ruben Dias, Kyle Walker
Midfielder: Bernardo Silva, Jude Bellingham, Kevin De Bruyne
Forward: Erling Haaland, Kylian Mbappe, Lionel Messi, Vinicius Jr.
Hmeichhia
Goalkeeper: Mary Earps
Defender: Alex Greenwood, Lucy Bronze, Olga Carmona
Midfielder: Aitana Bonmati, Ella Toone, Keira Walsh
Forward: Alex Morgan, Alessia Russo, Lauren James, Samantha Kerr
Fifa Fan Award
Hugo Daniel ‘Toto’ Iniguez
(Argentina club Atletico Colon fan)
Fifa Fair Play : Brazil