Daily Newspaper

MAHNI INTODELH LO A HUAISEN THEI NGAI LO VA, A ZAHAWM THEI NGAI BAWK HEK LO

11

M. Lalmanzuala

He thudik hi kan ram hruaitu intite pawh hian an hre ve thin a ni ngei ang, inthlan dawna an thil tum pawimawhte zinga a hmasa berah an dah a ni fo thin. Mahse, an ngaih pawimawh tak tak lohzia chu intodelh nan leh hmasawn nana hman tur Central Sawrkarina Cheng Vaibelchhe tel min pe reng chungin, intodelh chu sawi loh chawmhlawm ti tihin kan la awm reng si a ni.

Intodelha mahni ke-a ding lo chu a huaisen thei lo va, a zahawm thei hek lo tih hi ka ngaihdan nghet tak a ni a. Pi leh puten mahni khamkhawp thar ngaih pawimawh bera an neih a, purchâwk chu zahthlak, khawdanga purchâwk phei chu mahni bâkah mahni chenna khua tihmualphona ti hiala an duh loh ber a nih thin kha hriain, thisena an thlah hian an thuvawn kha vawn ve zel ka tum tlat a ni. Midang tanpuina chhete pawh dawng lova, an lo intodelh thei thin te kha an ngaihsanawmin an entawntlak tehlul nen, kan tunlai lalten entawn ahneka kutdawh ti tiha min awmpui reng mai hi chu a thinrimthlakin a zahthlak teh zawng a nih hi.

Pathianin a anpuia a siam mihring ka nih vanga keimaha Zahawmna awm chu humhalh tum tlat mi ka nih bawk avangin INTODELH hi ka ngaih pawimawh ber pakhat a ni thin a. Intodelh nana tan ka lo lâk ve thin dan ka’n sawi ang e.

1. Development Commissioner hna ka thawh tan atang khan buh leh bala kan intodelh nan leh hralh tham kan neih nan kan ram leilung leh sik leh sa mila thlai leh thei an that duhna bik ni-a hriat hmunah, ‘marketing’ pawh awlsam zawk dan tur thlir lawkin, chin uar dan tur rawtna mumal tak ka duang chhuak a. Mahse, Minister te chu sawi loh officer-te zingah pawh min tuipui an awm meuh loh avangin chutiang ruahmanna chu a hlamzuih nghal ta a ni.

2. Ram hmansawnna dik chu thingtlang khua-ah a intan tur a ni tih hi ka pawm zawng tak a nih avangin thingtlang miten an tuina leh hlawhtlinpui theih tur ni-a an ngaih zulzuia ‘Plan’ siam tur niin ka hria a. Chutiang tih nan chuan Minister, MLA tin te an bial headquarters theuha ‘Annual Plan’ buatsaihna an hman nan rawtna ka siam a. Chu meeting, vantlang hma-a neihah chuan Department aiawhte leh khaw tina pa rawn kai pahnih zel huikhawmin an khaw tana ‘plan’ an siam tura tih a ni a. Ka rawtna zulzui chuan chutiang meeting chu bial tin headquarters-ah an nei a. Plan pawh mumal tak an siam vek a ni.

Mahse, chu’ng plan te chu Planning Board Meeting-a kan ngaihtuahin Minister leh MLA te duh dan a nih loh thu sawi a nih avangin engmah lovah a chang nghal ta a ni. Thingtlang mite kuta plan pawisa hman tur zawng zawng a awm chuan, chung lama mite tan Eiruk theih a awm dawn loh avangin an duh dan a ni lo tihna ni ngei tur a ni.

3. Chief Secretary ka nih kum khan Cabinet Meeting-ah ei leh bara intodelh nana tihmakmawh, kan ram chhunga leilet siam theihna hmun chauha hman turin pawisa ruahmanna siam ka rawt a. An rem tih anga Planning Commission-ah theihtâwp ka chhuah avangin leilet siam nan liau liau tiin Cheng Nuai 12 (tun huna nuai 120 hu vel) min pe a. Chutiang atana leilet ram tha, Palak, Chamdur, Borapansury, Kau Valley, Vaphai te-a hmalakna tur ruahmanna ka siam te chu Cabinet Sub-Committee-in a remtih hnu-a MLA 13 rualin, “Hetianga pawisa tam tham tak, Bial 5 emaw lek chhung chauha hman a nih chuan, keini leilet ram tha neih ve loh vang maia engmah dawng lo tur te hian, eng tin nge kan bial mite hmel pawh kan hmuh ngam tawh ang?” an tih chuan chawp leh chilhin Ei leh Bara Intodelhna tur ruahmanna tha tak chu engmah lovah an chantir leh nghal ta mai a ni. Nuai 12 chu Constituency-wise, Family-wise-in Cheng 3,000 diat diatin an party mite hnenah an sem zo vek a. Buh fang khat mah thar nana hman a ni lo.

4. MPSC Chairman ka nih lai khan Hindi teacher pakhat meeting-a lo kal chuan Aurangabad-a training a neih laia a rizai thep a saiparhtir thu a sawi a. Lasaitupaina vawi hnih a sai chuan a hrui a chat a. Hrui thara thlaka a sai leh pawh chuan a vawi thumna-ah a hrui chu a chat leh a. Mak a ti lutuk chuan a lâ chu khawi lam lâ nge a nih a zawt a. Ani’n a’n hrilh chuan, “Hetiang lâ fei tha hi American-te chuan cowboy jean siam nan emaw-a man to taka an lei ngei tur a ni ang a. Nangni chuan rizai atan lo chuan hmanna tur in hre lo a ni awm a, in va mâwl awm ve?” ti-a a chhan thu a sawi a ni. Hetiang thu Khawbung vantlang inkhawmna-a ka sawi chuan, pa pakhat chuan, “Kan khaw tlangval Mandalay Cotton Mills-a thawk chuan, a thawhpuiten, Khawvelah Mizo lâ, a fei ber” an tih thin thu a sawi bawk.

5. Chhawhchhi hi phai ram te-a kg. khata a tel 30% vel an her chhuah theih laiin Mizoramah chuan 55% – 60% a her chhuah theih thung a. Kum 1988-a Cooperative Dept. Secretary ka nih lai khan Ratu tlangdung, W. Phaileng leh Tlabung-ah ka chin uartir a. Chutiang vel chuan an/kan her chhuak a ni. Beihpui thlâk ila chuan kum khat thil thu-ah kan têl mamawh chu kan thar chhuak thei ngei ang.

Congress Party ka zawm ve lawk chhung khan heng thil pahnihte hi kan chin uar theih nan rawtna ka siam a. Chu chu Planning and Programme Implementation Committee-in a pawm thlap hman a. Mahse, ka chhuahsan hnu khan bawhzui a ni ta lo a ni.

6. Member ka nih vena Darkhuang Society saw leilet siam nana din a ni a. Tuikawng tha tak leh tuikhuah lian tâwk a awm a. Vai buh ei lova, mahni eikhawp thar chhuah duh tlat mi ka nih avangin tun kum 20 chhung vel hian leilet ka enkawl a. Leimin avang te, tui tlem kum a nih vang te-a harsatna nasa tak ka tawh chang pawhin kan ei khawp chu ka la thar chhuak zel a. A châng chuan kan senso hisapa chhut chuan kan buh thar kg. khat chu Rs. 150/- hu vel a ni. Chuti chung chuan ka la bei zui fan fan zel a ni. Intodelh ngai pawimawh mi ka nih miau avangin.

7. Kan sawrkar hian tih tak takin ti sela, hetiang tih nana Central Sawrkar atanga pawisa kan hmuh te hi a hmanna turah hmang sela chuan tun hma kum 30 velah khan Ei leh Barah kan intodelh daih tawh ang.

Tun kum 50 chhunga kan sawrkar fawng vuantute hian kan sawi tawh ang khian an awr bâwk chung atanga an sawi thin bâk chu a taka tih engmah an nei lo tluk a ni. A hman lohna tur deuh veka an hman thin avanga chawmhlawm ti tiha awm zel hi kan ni.

Hripui lêng hi tam puiin a zui thin, tih thu te chu an hre ve a ni ang, buh chin uar a tul thu chu ring takin an auchhuahpui tih kan hria. Mahse, kan thar tam phah vak lo a ni ang, kan Vai buh/Ration lâk luh a tlem phah chuang lo a ni.

Silchar kawng a pin apiangin Tripura kawng, Manipur kawng hman tangkai theih dan kan zawn a tul an ti ziah a. Silchar kawng a inhawn leh rual rualin an thusawi chu an theihnghilh leh nghal a. Chu’ng kawng pawimawh te chu hman tangkai an nih theih nana awmze nei taka thil tih nei chuang si lovin an thu thar sawi leh mai mai rih a nih hi.

Tun tumah pawh hian lei dawh that ngai te leh harsatna dang dang an sawi bakah Kawrthah leh Mamit inkar motor lian kal nan a tha tawk lo te an la ti vel mai mai a nih leh kha. Chief Engineer Sachdeva hunlai daih tawha CULVERT THLAWK THEI a tih te kha an la hmu let lo te pawh a ni ang e.

Eng dang a ni lo ve, kan hruaitu inti vete hian kan ram chhunga kan intodelh theih nana thil thar chhuah hi an duh lo va. Thingtlang khaw tina mite an intodelh chuan, Inthlan huna lei theih an awm dawn lo tih an hria a. Chuvang chuan intodelh lova awmtira an lei duh huna lei theiha an nih kha an duh dan a ni. Chu bakah kan ram chhunga thil thar chhuah atang chuan eiruk tham a awm lo va, pawn lam atanga lak luh erawh chuan zawng chhangna khawpa tam pawh pen theih a awm a. Chu chu an thlahlel tlat a ni.

Hetiang tih chingte hi kan hnâwl vek a, hetiang tih ching lote hruaitu-a thlan nachang kan hriat hunah chauh Ei leh Bar leh thil pawimawh dangah kan Intodelh thei ang. Chutih hma chuan, ‘Hmangaihte tahna khua a sei lua e, an ti’ tih hla hi kan sa fo ang a, tah leh Ha thialna hmunah kan awm reng rih dawn a ni.

Faktea thâwm hi kan hre khat ta deuhva a tawngkam hawhna remchangah hmang ila, “Ka unau, chu chu engtikah nge i hriatthiam ang a, engtikah nge i thanharh dawn????”

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy