Daily Newspaper

MAHNI PIANPUI TAWNG NGEIIN AW!

20

-Zoremi Hmar Zote

National Education Policy (NEP 2020) chu union cabinet chuan ni 29 July khan pawmin, chu chuan National Policy on Education 1986 chu a rawn thlâk ta a. NEP 2020-ah chuan, naupang zirtirna-ah pâwl nga thleng chu mahni pianpui tawng ngei hman tur tih a ni a.

NEP 2020 hi Mizoram state pawhin a zir chiang mek a, tun hnaia NEP 2020 chungchanga state leh UT Governor leh Lt Governor ten video conference an neihnaah pawh, Mizoram Governor pawhin mahni pianpui tawnga lehkha inzirtir chu tha a tih thu a sawi ve bawk. NEP-2020 ah hian, naupang zirtirna ‘medium of instruction’ ah pawl nga thleng chu mahni pianpui tawng (mother tounge or local language) hman tura tih a ni a, hei hi a remchan chuan ‘pawl riat thlenga kalpui theih chu duhthusam a ni e’ tiin NEP-2020 hian a pawm a ni.

Prime Minister Narendra Modi pawhin, “He education policy hian zir mai ni lovin zirthiamna a ngai pawimawh a. Curriculum piahlamah Critical Thinking a ngai pawimawh tih thu sawiin tuina, a taka tih leh preformance te chu kalphung aiin ngaih pawimawh an ni ang a. Education policy thar hian learning outcome leh zirtirtute training leh zirlai zawng zawngte dinhmun chawikan a ngai pawimawh dawn a ni,” a ti.

He Education policy thar hi kan hmang a nih ngat chuan English medium-a kal zirlai naupang tân hian khua a vâr ve ta deuh dawn niin a lang. An han kal thei tawng tawng a, Anganwadi ai chuan pre-school kan han thlang nghal pang a. School lut rual an ni tawh e tiin, English medium-ah pawh sâp tawng hmang nasa leh naupang tawng hman chungchangah pawh sâp tawng inhman luihtir nasatna apiang School tha niin kan hria a, school tha teh na’n tak hmangin, kan bawh huam huam mai ta thin a.

A chunga kan sawi tâk, Pu Modi-a sawi ang chiah khian, policy tharah chuan zirna aia thiamna ngaih pawimawh a nih dawn miau avangin, zirtir an nihna atang leh, an by-heart sa hmang chauha tha taka an pass ringawt kha duh tawk lovin, an thil zir kha a thiamin an thiam tak tak dawn ta tihna a ni a. Mathematics thiam hlei thei lo leh, vawiina an thil zir, an by-heart ngawt ai kha chuan thiam tak takna leh, eng chiah nge a nih tih, a hriata hriatna tak tak an nei thei dawn ta tihna a ni a, a va tha ve!

An zirlai awmzia leh nihphung hre chiang mang lo tura naupang, bul kan tanpui thin hi a fuh lo a ni. A chhiar zawng, an chhiar thiam ve mai tho na a, Mizo tawngin eng nge a nih chiah hre miah lova exam-a tha taka pass ve mai naupang hi kan tam hian ka ring alawm maw aw! A bulthut atanga an hriatthiam tura zirtirna kan kalpui hi a hun tawh tak meuh a ni. Nikhua an hriat phat atanga sap tawng thiamtir kan tùm ruh tlatna leh, kan inchhung leh khawlai tawng(Local language) ah Mizo tawng hlir kan hmang bawk si hi thil inkalh angreng tak a ni. Chu vang tak chuan alawm, Mathematics bikah phei chuan kan chak loh zual a, kan man theih loh fo thin ni!

A Mizo tawnga sawi ngial pawha man mai harsat tak tak naupang hi a tam zawk an niin a rinawm a. Chutih laia sâp tawng hlira sawi leh nghal phei chuan an kût chi lo hàwi vel mai mai fo dawn tih a lang reng mai. Chuvang tak chuan a nia, nu leh pate duh khawp lo hian tutor ruaiin, in lamah tuition class kan la kaltir hrám thin ni! An zirtirtute mawhpuh ngawt pawh kan awm fo va. Zirtirtu thiam loh leh fel loh lam ni lovin, naupangin a hriatthiam ngei tura zirtirna a dawn loh avàng leh, kan zirna kalphung dik tawk loh avàng zawk a nih hmel; chu tak chu thlâk a, kalphung thar duan hi a hun tawhin a tha em em dawn a ni.

Sâp tawng thiam hi thil pawimawh em em mai, eng hna pawh thawk dawn ila a lova awm hleih theih loh khawpa kan ni tin nunphunga bet tlat mai a ni tih chu phat rual a awm lo ve. Chutih rualin zirna in, la nâu fâl deuh kal thinna te, tlem leikãng deuh tawh kalna thlengin, thiamna tak tak kan fah dawn a nih chuan an hriatthiam nghal theih tur, kan tawng ngeia zirtirna pek mai kha a tha a ni. An sâp tawng thiamna khua a tlai dawn lo. An zira kha a awmzia hria se la, thiam ngei bawk se la; chu chuan an zirna kawng thui tak a lo sial lâwkin, rahbi rem a lo tuksak zawk dawn a ni. Sâp tawnga sawi fiahna man mang lo na na na chu a sâp tawng pawh thiam em em lo, Mizo tawng thiam bar chuang lovah kan inchhuah rúih palh thei a nia.

Tin, sâp tawng hi ngaihsan chiam emaw, ngaih ropui hluah a tul ber lo. Chu ai chuan kan fate thiamna tak tak, tlo zawk tur leh an hma lam hun atana pawimawh hi ngaihtuah zawk teh ang u. Sâp tawng thiam deuh, chhawrna awm lo, hna tha leh sâng deuh thawk ta chuang lem si lo hi he kan ram zîm té-ah hian kan inthiat fur mai ang; a tha lo. Sâp tawng kan va hnualsuat emaw, kan sawisel emaw a ni law, thiamna tak tak aia ngai pawimawh ang deuha kan lan fo avangin, an hriat thiam theih turin, kan tawng ngeiin zirtir ila, lehkha hi thiam tak tak zawk rawh se kan ti a nih hi.

Lehkha thiam thei lo kan han tih mai, zirna beidawnsan tam tak hi tuna kan sawi mêk thil hian thui tak a nghawngin ka ring. Zirna kawnga chak bik, thil man hma em em mai awm ve bawk mah se, a zirlai nâwlpui hi chu chak em em lo leh, hniam bik lutuk te, lehkha pawh zir thui thei lo, pawl sawm vela tâng ta mai hi kan tam zawkin ka ring a. Hêng mite tan hlei hlei hian NEP hi a pawimawh; in lamah nu leh pa ten Mizo tawngin kan zirtir a,(english hlira fate lehkha zirtir thei hi chu zaah panga pawh kan ni kher lo mai thei!) school lamah sâp tawng hlirin an lo sawi leh bawk si a, naupang an lainatawm! Mathematics bik phei hi chu kan pianpui tawng ngei hian zirtir teh un!

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy