Rebecca Saimawii chuan a music video ‘Hringnun’ tih chu August ni 1-ah a tichhuak dawn ta. He hla hi 2021-a a phuah tawh kha niin, June thla laihawl khan Aizawl-ah rawn chuang chhuakin recording leh music video tur a rawn buaipui a, tunah chuan peihfelin, August ni 1 zan dar 8-ah a YouTube channel-ah a dahchhuak ang.
Makuri chuan a video thar tur hi a teaser tichhuakin, a Facebook-ah, “Khawl ngawta rem ka duh lo a. Mizo zinga rimawi tum thiam ka sawm ten a tak (live) ngeiin min remsak se, ka tihna chu pawmin, tlawmngai takin kei tehlul hi phur takin min pui vek a,” a ti.
He a hla tharah hian Rema (bass), Ben Opa (drums), Samuel Chawngthu (keyboard) leh Jonah Ralte (guitar) ten an pui a, a nau Atea’n a zai pui bawk.
