Maldives-in India sipaite duh lo

Maldives president-elect chuan an ram chunga Indian military personnel awm te chu an nawrchhuah vek tur thu a sawi.
Mohamed Muizzu chuan chakna a chan hnuah Maldives-ah ram dang sipai awm an duh loh bur thu sawiin chu chu khua leh tuite duh dan pawh a ni tiin a sawi a.
“Mipui ten foreign military an duh loh thu min hrilh a ni,” tiin Muizzu chuan a sawi.
Chu tak chu India tan erawh India Ocean region-a China nena inbakkaih reng an nihnaah chanchin lawmawm lo a ni thung a. Maldives president thlan a nih lai khan India nge China thunei zawk tiin enfiahna anga ngaih a ni.
President kalchhuak tur Ibrahim Mohamed Solih chu India lamtang anga ngaih niin Muizzu party People’s National Congress te erawh pro-China turu anga ngaih an ni.
Muizzu leh a party tena inthlan campaign auhla bera an neih pawh an ram chhunga Indian military personnel awm chungchang niin a kum a kum ‘India out’ strategy an lo kalpui tawh a ni.
Solih thung chuan Maldives a India sipaite awmna chhan chu ram pahnih tena lawngchawlhna siama inremna an neih vang mai niin sovereignty tibuai tur a ni lo a ti ve thung.
Maldives-a India sipai awmzat chiah hriat a ni lo va, sawiseltute chuan inremna siam chu langtlang taka pholan ni lovin India sipaite inbun chuan ngaihthatlohna tam tak a siam an ti thung a. India sipaite chuan Maldives hnenah hian helicopter pahnih an lo pe tawh bawk.
Maldives president hlui Abdulla Yameen, leader of the People’s National Congress khan Maldives chu China kalpui Belt and Road Initiative-ah kum 2013 atanga 2018 a rorelna a chan lai khan a lo rin lut tawh bawk a ni.