West Bengal assembly inthlana an chak loh hnuah Mamata Banerjee-i Trinamool Congress (TMC) buaina a zual zel a, inthen mai thei niin an lang mek.
MLA Ritabrata Banerjee-i chu party atanga hnawhchhuah a nih hnuah Nilaini khan state assembly a thleng a, MLA 59 thlawpna a neih thu a sawi.
Member 294 awmna rorelna inah hian party hian MLA 80 an nei a. Chief Minister Suvendu Adhikari-a kaihhruai BJP chuan a vawi khat nan an state-ah hnehna changin seat 207 neiin an dinhmun a tha hle.
Ritabrata Banerjee-i hian Leader of the Opposition angin a inlan a, thlawpna lehkha a lek bawk a. Assembly-a a zuitute zingah hian Arup Roy, Shiuli Saha leh Akhruzzaman te pawh an tel.
Bengal hmar lam atanga legislator Sabina Yasmin-i chuan, “Vawiin hian Leader of the Opposition thlangin kan thukhawm dawn,” a ti.
Mustafizur Rahman pawh Ritabrata Banerjee thlawpna lehkha ziaktu zingah a tel a. “A zat tak kan hre lo… pawn lam atangin signature 59 an dawng tawh tih ka hria a. Kei pawhin ka sign tawh,” a ti.
MLA Priya Paul-i erawh chuan thil chiang a sawi lo va, “(Assembly) chhungah ka lut dawn a, kan thutkhawm zawhah ka sawi ang,” a ti.
Trinamool MLA hel tia sawi mi 58-ten Ritabrata Banerjee-i leader of opposition-a an vawrh chhuahnaah an hming an ziah chu speaker hnenah thehluh a ni.
Lehkhaah hian TMC ‘dik tak’ an ni tih ziah lan a ni a, mak tak maiin Mamata Banerjee-i chu an pawl hruaitu a nih thu a lang bawk.
North Kolkata-a Entally bialtu, Sandipan Saha leh Howrah district-a Uluberia (Purba) bialtu, Ritabrata Banerjee te hi Thawhtanni chawhnu khan TMC chuan party dodala an chet avangin a hnawtchhuak.
An buaina hi Mamata Banerjee-i’n an hruaitu hlun, Sobhandeb Chattopadhyay-a Leader of Opposition atana a ruat atanga intan a ni.
Sandipan Saha leh Ritabrata Banerjee te chuan Bengal assembly-a Leader of Opposition atana Sobhandeb Chattopadhyay thlawpna lehkhaah hian signature lem a awm niin an sawi.
Chief Minister Adhikari chuan thuthar thehdarhtute a kawmnaah, “TMC eirukna hian Bengal mipuite chauh ni lovin anmahni MLA-te pawh a bitum a, anmahni MLA-te hming pawh an ru a ni. He complaint hi an MLA pahnih, Ritabrata Banerjee leh Sandipan Saha te siam a ni a. Hemi kawngah hian tel vena kan nei lo,” a ti.
Hemi chungchangah hian Assembly Secretariat chuan police case a thehlut a, CID-in an chhui mek.
Chief minister chuan CID-in lehkhaa hming lang MLA-te hnen atangin signature sample lak tan a nih thu a sawi a, “CID hian MLA thenkhat,lehkhaa hming awmte hnen atangin signature sample a la a. TMC MLA pathum – Baharul Islam, Arup Roy, leh Subhashish Das te chuan CID hmaah chu document chu an sign lo tih an inpuang tawh a ni,” a ti a. Investigating officer chuan tih dan phung angin hmalak dan tur a ruat dawn tih a sawi.
State-a thuneihna an hloh hnuah TMC party hruaitu eng emaw zatin an party kalphungah lungawi lohna chu tlang takin an sawi chhuak a ni.
Mamata-i TMC chhungah inmil lohnain bu khuar
