Daily Newspaper

Mamata-i’n Opposition-te tangrual turin ngen

29

Pegasus spyware chungchangah Supreme Court chuan suo motu kalpui tura ngenin West Bengal Chief Minister Mamata Banerjee chuan Opposition party tinte chu BJP inthuruala do turin a ngen bawk.

“Judge phone-te ngaihthlak ruk a nih laiin eng vangin nge Supreme Court-in suo motu a kalpui loh? Suo Motu emaw court kaihhruaina hnuaiah Special Investigation Team (SIT) din a nih loh…judiciary chauhin democracy a chhanhim thei” tiin Banerjee chuan a sawi.

Kolkata-a Martyrs’ Day rally neihnaah thusawina a neih chu State hrang hrangah live telecast-a pekchhuah niin Trinamool Cngress chairperson chuan Opposition party te chu a rang thei ang bera tangruala BJP te do turin intukkhawm turin a ngen bawk a ni.

“Inthurualin, kan mimal duhdan te dahthain he ram chhanhim tur han kan chet a ngai a ni. Thawkho tur chuan muangchang hauh lovin politics pawl kan din a ngai a ni” tiin Banerjee chuan a sawi.

Trinamool Congress chairperson chuan tun thla tawp lamah New Delhi a kal tur thu sawiin July 26 leh 29 inkarah Opposition party leader meeting awm se tel a inpeih thu a sawi bawk.

“Hruaitu pawimawh tak tak Chidambaram (Congress), Sharad Pawar (NCP) te pawh hmuh ka duh a, July 26 leh 29 inkarah meeting neih ka inpeih reng” tiin a sawi bawk.

Banerjee hian July 25 hnuah kum hnih hnuah New Delhi a pan dawn a. Chief Minister chuan Opposition leader tinte chu Pegasus spyware case-ah nem hauh lo tura ngen bawkin joint movement kalpui ngei a duhthu a sawi bawk.

“Inthlanpui hmachhawn turin kum hnih leh a chanve a la ngai a, inthlan dawn hnaiah chauh kan tanrual chuan engmah kan hlawhtlinpui lovang” tiin a sawi bawk.

Banerjee chuan Opposition leader Pawar, Supriya Sule, Chidambaram, Digvijaya Singh, RamGopal Yadav, Jaya Bachchan, Tiruchi Siva, K. Keshav Rao, Manoj Jha, Priyanka Chaturevedi te a thusawi Constitutional Club, New Delhi-a live telecast lo ngaithlatute chu a fak bawk.

Banerjee chuan Pegasus spyware-ah BJP sorkar chu a sawisel na hle a. A phone chu tapped a nih thu sawiin a cell phone chu phochhuakin a phone camera tape a pholang a ni. “Ka camera ka tuam a, GOI pawh hi tuam a ngai a ni” tiin a phone pholang pahin a sawi.

“Chidambaram, Sharad Pawar te ka be thei loa chhan chu ka phone a ruka ngaihthlak a ni a, Delhi CM, Telangana CM emaw CM dang hrim hrimte pawh ka be thei lo. Eng nge Pegasus?” a ti bawk a.

Banerjee chuan a thusawi karlakah ‘Pegasus hi a hlauhawm’ tiin a sawi fo bawk.

Trinamool Congress chairperson chuan BJP chu ‘high-load virus’ party tia sawiin Prime Minister Narendra Modi pawh Covid-19 pandemic leng thawh hnihna dona kawnga hlawhchham thak tiin a sawi bawk.

West Bengal mipuite chu a term thumna chelh tura an thlantlin avanga lawmthu hrilhin Gujarat ni lo “Bengal hi India ram model state a ni” tiin a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy