Site icon The Aizawl Post

MAMIT KAN VANGLAI LEH C.D BLOCK-V

MAMIT KAN VANGLAI LEH C.D BLOCK-V
By Lalhmangaiha Sailo
Holy Cross Bakery
Ph : 9436360275
MUMAL TAKA C.D BLOCK KALPUI THEIH ANI TA LO :
Mizoram chu sawrkar in sawikhawm programme a kalpui tak avangin Mamit pawh Grouping Centre lian tak alo ni ta a. Tuna Mamit Bazar hmunah hian hruaikhawm ho awmna tur Bukte sak khah tlat a ni a, a thlang lam Pu Ralhnaia te awmna thlang lam mual zawl vel thlangah khuan Luangpawl lam atanga khawmho te an awm nual bawk a. Mi thenkhat chhungte bel bak hmun remchanga inbengbel ta mai an awm bawk a. Vaisam leh Sabual lam ten tuna Vengthar Biak in hmun phei lam hi an bawh thung a ni.
Block Staff te pawh Aizawl lamah leh Grouping Centre dangah te an insawn chhuak ta nual hlawm a. Insawn chhuak ve lo la awm te pawh chu, thenkhat chuan an mahni Parent Department lamah an kir leh nual bawk a. Mamit Grouping Centre pawh chu Administrative Officer in a rawn awp ta a. Capt. D.Pathaka chu A.O hmasa ber niin Mamitah a rawn zawm a, Staff la invawm chhuak ve lote chu min rawn awp khawm ta a ni.
MAMIT KAN BUAI :
Hetih hun lai hi Mizoram hmun tin kan buai vanglai tak a ni hial awm e. Hruai khawm a ni a, mumal taka thlawhhma lak theih a ni lo. Mahni khawhlui-khawram tlawh leh huan thlai chul ram fang tura han chhuah tak ngial pawh a theih meuh loh. Han zin chhuah hlek dawn leh Movement Permit nen lo chuan chhuah chi pawh a ni lo. Khaw tinah Duty Post paltlang tur awm in, sipai duty ten an lo check zel bawk si nen, buaithlak ang reng tak a ni.
Dampui khua chu an In leh lo sawi thiat miah loin Mamitah an sawikhawm thut a, mutbu leh eirawng bawlna hmanrua bak keng thei hek lo, an thingrem ken theih loh te chu kawng sirah a let rem rum a. Hun tlema a thawl deuh hnuin Pu Pangliana, Dampui pasaltha leh khaw hotu chuan an khaw ram a va tlawh chu, a lung a leng ngang a ni ang, an In an lut chu tapchhak zawlah a dan pangngai te ina thu a, an kawt laia hmarchate tiak te pawh a rah in a lo hmin tawh a. Chungte chu va loin an rawtthleng ah an rawt tau salh salh a, a lungleng chuan tumah hlauh leh mitmei ven tur pawh nei lo in zankhat an khumpuiah a riak a. Lungleng thinrim inseh ruh teuh chungin, khaw khawm hla Pu Suakliana phuah “Kan hun tawng zingah khaw khawm a pawi ber mai” tih hla aw tial ruai a sa chungin Mamit lam a pan a. An ni chhungkua, an tu leh fa hote hi – an khaw lama kir leh hmasa ber pawlah an tang nghe nghe a ni.
TAM KAN TAWK TAN :
Khaw khawm hmaa kan buh thar te kan ei zo thawkhat ta a. Khaw khawm lah chu kan han ngeih lo laileng khawp a, naupang kawthalo te a leng a, ni tin mitthi kan nei a, a chang chuan 2/3 te neih chang a awm. Tunhma Tut dunga vai maji kal vel thin awm ta lo nen, motor lah Sairang bak thleng hek suh, hmun thenkhatah Ambush tih leh khaw hal thawm hriattur awm zut leh sipai kal vel puakphurh lo ni chhen bawk nen. Sawrkar hnathawk chenin khawsak a buaithlak em em tlang vek a ni. Kan ei chhiatzia lah chu, chawei lai inhmuhpui a inlen tawn chi pawh a ni lo. Curfew a ni deuh reng a, zan inkhawm theih loh leh khawhar ina zan lam lenkhawm leh zai theih bawk hek suh. Curfew vin lutuk tur erawh Asst. Commissioner, Central Inteligent S.I.B te leh Civil Police Out Post te a awm avangin a ziaawm deuh.
TAM A ZIAWM DEUH :
Administrative Officer office pawh mumal takin a kal chho tan a, Civil Supply lam pawh thlawhtheihna in a rawn thlak tan ta a. A chang phei chuan nikhatah vawithum vawili dawn te a rawn thlak chang a awm, a rawn thlak tlai deuh tum phei hi chuan, chharkhawm zawh hman loh hlau a losul haw te hi chelh din a, phungbawma sawm chang a awm thin.
Godown lian tak, tuna High School hmun sir C.R.P Camp hnaihah sak a ni a. Item chi hrang hrang; Buhfai, Atta, Chini leh Dailuah thlengin supply a rawn thlak a, a chang phei chuan khawnvartui thlengin parachute-in a rawn thlak chang a awm. Heng hun lai kum 1967-1973 chhung vel hian Mamit Administrative Centre-ah hian heng Officers te Capt. D.Pathak, Capt. J.N. Kalita, MC Goswami ACS te leh A.C Das ACS te hi Asst. Deputy Commissioner-in an rawn awm a, Civil Supply lam pawh kan hnianghnar ta viau a ni. Development hna lam erawh thawh mumal a la awm meuh lo a, Staff lam te erawh chuan Movement Permit leh Supply lam kan buaipui deuh ber a ni.
Asst. Deputy Commissioner hote an insawn chhuah hnu hian Pu Lalphunga Sailo chu A/O, BDO in an rawn dah ve thung a, ani hun lai hian Lokicherra (Zawlnuam) ah Community Dev Block hawn thar a ni a, Mamit Dev Block pawh chu W.Phailengah sawn phei a ni. Block hnuaia hnathawk Staff te pawh mahni remchan ang angin a then W.Phaileng Block ah, a then Zawlnuam Block lam ah inthen darhin, Mamit A.O Office a thawkzui ta zel zawk te pawh an awm nawk a ni. Mizoram chu Union Teritory (U.T) ah hlankaiin, Legislative Member te pawh inthlangin Mizo Union leh Congress tangdunin sawrkar an siam a. Pu Ch. Chhunga chu Chief Minister niin, Mamit erawh Grouping Centre niin Administrative Officer (A.O) in a la awp zel a ni.
SUB DIVISION KAN CHANGLO TEP :
Mipui nawlpui chuan Mamit hma lam awm dan tur hi kan ngaihtuah lem lo. |henkhat erawh chuan hetia Zawlnuam lama Block thar te an hawn a, kan Mamit Block thlenga W.Phailenga an sawn tak hi chuan Sub-Division hi chu sawi vak ngai lo in Champhai leh Kolasib te nen hian min hlangkai chho mai turah kan lo inngai thla rawk a, a teuh lo mai. Cabinet-in W.Phaileng a dah turin an ti fel tawh tih thawm kan hre ta, he thu kan hriat chuan tumah dang rawn loin Pu Lalphunga Sailo hoin Pu Lalhnuna VCP, Pu Saitawna, Pu H.Zaikhuma, Tv. Z.Lalhmingliana, Tv. Lalrinawma, Pu Lalropuia, Pu Lalhmangaiha Sailo leh Pu Thangngaia te ho inhmukhawm in hmalak dan tur kan rel ta chuk chuk a.
A thawh khat nan Pu Lalhnuna VCP hoin Saitawna, Zaikhuma leh Tv. Lalrinawma te Aizawlah kan tir chho ta, anni hian Pu C.Chawngkunga, Bialtu MLA han hmu hmasain anin hotu pawimawh hmuh tur te a lo ruahmanpui vek a. Pu Ch. Chhunga C.M, Pu Ch. Saprawnga Party President leh Cabinet Minister te hmuin, khawthlang lam tan Sub-Division hmunpui atana Cabinet-in W.Phaileng an lo ruat tawh chu sut leh a Mamita dah zawk turin theihtawpin an han bei a ni.
A thawh hnihna chu Pu Lalphunga Sailo hoin an thawkchho leh a, hemi tum hian Pu C.Chawngkunga ho bawkin MLA dang hmelhriat leh ngamtlak deuh deuh te Pu Joe Ngurdawla, Pu C.Lalruata, Pu Vaivenga leh Pu R.Thangliana te sawm khawmin inkawmhona hun tha tak an han hmang a. W.Phaileng aia Mamit chu Sub-Division Headquarter atan a that zawk leh a remchan zawk thu sawina hun remchang tak neiin, session hmasa berah Cabinet thu lo tih thluk tawh chu sut leh tura theihtawp lo chhuah turin an han sawm (thuthiam) a ni ber.
A thawh thumna chu Pu C.Chawngkunga’n Chief Minister leh Cabinet Minister te hmuin, heti hian Sub-Division pathum hawn turah hian ka thiante Pu Lalhlira Bial Champhai leh Kolasibah te in dah a, ka bial Mamita in dah dawn lo a nih chuan ka bang dawn tiin a tawng chhuak a. Cabinet chuan an thu lo tih tluk tawh chu sut leh in Mamitah an sawn ta a. Mamit Sub-Division chu a lo piang ta a ni. State kan ni chho zui a, Mamit pawh District Headquarter a lo ni ta zel in, kan khaw mi ngei Z.Lalhmingliana MCS chu S.D.O leh Mamit D.C hmasa ber a ni ta nghe nghe a ni.
Mamit kan vanglai chanchin tlangpui kan han tarlan thin te hi, hmanni lawk emaw kan tih laiin kum 50 dawn a lo ni der dawn ta mai. Heng hun laia kan lungrualpui thin ten mual min liamsan zo tawh a, mi tlemte pahnih khat bak dam pawh kan awm tawh awm lo e. |hangthar zel te tan erawh pi leh pute sulhnu tia thlir liam mai lo in, eng angin nge khawtlang tan an lo thawh thlir zui zelin, hmasawn zai i rel ang u.
Heng hun laia Mamit khawpui awm zel dan tur Pu Z.Lalhmingliana MCS thlir lawk leh ruahman dan te, Mamit ram vel chanchin leh thil thleng hriatreng chi te Part-VI lamah tarlan kan tum dawn nia.

Exit mobile version