Lalhmangaiha Sailo
Holy Cross Bakery
Ph : 9436360275
Mamit Kan Vanglai X-na Tar Lungleng tih ah khan Mamit dai vel kan chettlat dan ka rawn sawi tan nual tawh a, in chhunzawm leh dawn teh ang aw!!
Thla hnih hnu mai ah hian ram roreltu tur kan thlang mai dawn a, thu benglut leh thu tha tak tak hriattur leh chhiartur a tam a, “Kan tha ber” “Chutiang khatiang chuan Zoram hmasawnna tur leh retheite khai chhuah nan hma kan la ang” “Kalphung thar chu chutiang chu a ni” “That loh theih lohna bawm” “Pathian leh kan ram tan ti tu te kan ni” tih thu lam sawi ngaihthlak leh chhiarte hahchawlhnan leh thawk han lak nan ni thei se.
Kan han sawi leh tur hi tun hun atan chuan thil awihawm leh ni thei a ni dawn em ni? a tih theih awm e. Mahse Reality Action (Adventure) a ni a. Tun hma kum sawmnga hunlaia kan ram ngawpui leh a chhehvel awm dan leh nungchate tam dan te pawh a ngaihruat theih awm e, tunah chuan kan in bul leh dai bul Huan, Phuihnam rah hmin, Kelbuh leh Thingfanghma hmin chen a min tlanpuitu thin Tlaiberh, Tuklo leh Vate tak ngial pawh hmuh tur a awm ta lo.
Kum 1975 favang lai a ni a, ni khat chu, Phaizau Tuikuk nu ho Mamit supply buhfai lei tur lokal ho zingah nu pakhat Vahui rawn zuar hi ka hmu hlauh mai a, ka leisak pah chuan, “I Vahui rawn ken hi tu man nge? Khawilai hmuna an man nge?” tih dilchhut angreng takin ka lo zawt a. Huilen a an man a nih thu leh an man na hmunlai thlengin min hrilh a. Tut lui Vaak Lipui chung zawn Tinghmun ram kawn phei tih an sawi chuan, Tut lui hnar lam hnahkhar tlan leh Vaak Lipui chung kham rep al tlan te inkal pawhna kawn remchang tak a ni tih ka hre mai a. Hun remchang neih veleh a Huilen zar thei mai tur chuan ka len pawh ka thawm tha ta sauh sauh a, tunge zarpui ah ka sawm ang tih ka ngaihtuah zui a.
Tuk khat chu, ka thenawmpa Lianchhunga a lo lenglut hlauha. Huilen zarpui ah ka lo sawm chawt a, a ni hi Pasaltha, sa te pawh kap thei tak a ni, a lo remchang hlauh mai a, a tuk ah chuan Huilen zar tur chuan kan inbuatsaih ta. Anin silai ulhbun mal a rawn hawlchhuak a, zan hnih riak tur buhfai leh tul ang ang te nen bawr angreng takin Phaizau lam pan chuan kan chhuak ta a.
Kan Huilen zar na tur hmun tak hi ral atanga in kawhhmuh ngawt kan nih avangin, a kawng kanla hrelo nen Phaizau kan thlengthla chu thenawmpa Pu Bawma in ah kawngchin te zawt pahin kan chawlthla zawk a, min hrilh thei fumfe an awm loh avang chuan, tlai lam a zar hman ngei tum chuan kan chhuak leh a, chawhnu her a ni tawh. Tut lui chu remchang lai ah kan kan phei a, tlang dunglam enzawn pah chuan mau hmunah kan lut chho ta ngawt a, kawrte rum zet hi kan zawh chho ta zel a. Nghalrual kan thawng darh ta huk mai a, a rawn hawk dur dur mai a, mak tak mai in a tam zawk an tlan liam hnu chuan a pui khan min fiah a tum nge ni! Kan lam hawi khan a rawn hawk ta dur dur mai, Lianchhunga chuan tikhan lo awm la ka va veh ange tiin a pan phei ta, reilo te hnuah Silai a ri ta, ka pawh phei ve nghal vat a, Nghalpui sum(5) zet chu alo thal der a.
Nghalpui kap e tilo chuan, kan tum ber Huilen kan zar hman ta lo chu pawi ka ti ang reng a, engtinnge kan sa kah chu kan tih ang tiin kan thlek dun ta ran mai a. A zawnna te siamin zawn kan han tum sateh kan bawngbawr, kawng sah chawp ngai nen kan zawn zo der mai silo. Kan kalna lam kawrte ruamah kan hnuk thla, kan lumpui thul. Kawrte kamah hian chhawlchhin mai ila, khaw thim hmain Phaizau thlen thlak tum mai ila tia kan ruahman lai chuan, kan chhak lamah mihring thawm kan hre ta, kan hawichho chu Takam tlangval pahnih ramvak hawlam chu niin, kan ko thla a, phur zetin min zawn sak ta a. Kan Sanghal kahna chhak lawk kha kawng tum bel tak chu niin, kan han thleng phalo deuh chauh alo ni, Phaizauah Pu Bawma inah kan thlen a, kan riak ta a.
Zing kan tho chu helai hmun thleng tawha Huilen zarlo a haw leh mai chu ka hreh deuh a, kan hlawhtling thawkhat a lawm mawle, tih tawh awm tak anih vei nen! Tukthuan kan eikham, beisei hauh lo in ka thianpa Runa Nul hmun kal tum chu a lo thleng hlauh mai a. Nul hmun lama kal talo chuan Huilen zar tur chuan kan kal dun ta. Sanghal sa te chu Lianchhunga rualin Tuikuk nu ka phurh chhoh tir ta. Kawng chin kan hre tawh bawk a, kan len zarna tur hmun chu kan thleng chho ta mai a, mau hmun a ni a, khan khat chauh an sat kua a, a khan kher mai, riahbuk kan sual zung zung a, tlai dar thum (3) atangin len zarin ka thu tan ta a, thianpa Runa’n eirawngbawl pahin bawmrang a lo tah thung a.
Minute 5 hnu, Panama Sikret tlawn khat pawh ka la zu zo hmanlo, Huipui panga in thawk leh khatah an rawn su a le, ka phu nasa teh asin. Ka tung fel leh hman chiah tih in ka hnunglam atangin Bullut 4 (Pali) in ka chhip rawn thawi fua khawpa hniam ah Hui dawla man tawkin an rawn su leh chu ka kang dawrh a, tuan a tha viau na in an rawn liam runpui lai chuan thianpa Runa’n min rawn puih chang a awm thin. Man apiang bawmrang (Arbawm) ah kan thun zel a. Tlai nitlak hma deuh in thlangfe atang hian Vahai pali (4) hi an rawn inzui chho a, Sava dang angin direct in an rawn nawk (thlawk) lo a, vawi hnih an rawn chawlh chhoh hnu chuan an rawn su ta le, an inzui avangin pathum (3) ka huilut a, pakhat erawh ka khawmlut hman ta lo hlauh.
A tuk zing dar nga atangin kan zar tan leh a, chhun lamah kan chawl a, tlai lam dar thum atangin kan zar tan leh a, kan zar hmasak ber ang em chuan kan buai lo na in, khawhar hmanloin min nawk reng tho mai, haw dawn tuk thlengin kan va zar a, kan la man ve nual tho.
Kan Huilen zar tluka hlawhtling leh man tam hi sawitur awm tak maw!!! A hmuna tuk leh zan a kan ei bakah Vahui 75, Bullut 4, Vahai 3 bak ah Thuro, Mimsirikut leh Vate engmaw zat kan man a, Pathian hnenah lawmthu sawi leh ngaihdam dila Bethel-na te kan nei a. Lalpa i pawi kan sawi a nih chuan min ngaidam ang che, “Hman ah Israel fate pawh thlalerah an tan Vahmim leh Mana te pawh i pek kha, tun ah hian keini pawh kan ei atan, Vahui, Bullut leh Vahai te min pe a, kan lawm khawp mai,” tiin kan tawngtai a ni. Kan thiandunin hlim takin iptepui a kan ah bak Arbawm (Bawmrang) in kan zawn chho a, tuma hnenah hralh leh thehthang loin in kan thlen a ni. Ka thianpa Runliana (Runa) hi tunah kum
80 ral kai tawhin Mamit Hmunsam vengah a la dam a, thenrual pawlin pawnlam erawh a chhuak vak tawh lo.
Tun huna khawthlang lama zin chhuah nikhua te hian, heng hmun Mamit Kan Vanglai huna kan ram vah thinna ram te hi ka thlir vawng vawng thin a, thenrual hluite hmuhtur awm tawh lo nen ka hawi kual ruai ruai a, lung erawh a leng a ni, Tar Lungleng tih takah.