Lalhmangaiha Sailo
Holy Cross Bakery
9436360275
NU ZING BUHDEN A TAWP E :
Miten Article ril pui pui leh ngaihnawm tak tak an chhuah lai a, kei a lungleng khawharin aricles tual chher tak tak nun hlui chanchin inthlahrung tak chunga ka ziah min lo chhuahsak ve thin hi ka lawm khawp mai. Ka beisei phak loh mithiam tak tak leh ka mi ngaihsan tak tak ten an lo chhiar ve thu min rawn hrilh te hian ka lawmin min tihuai a, tlangnel takin kan ziak ve leh thla rawk thin a ni. Tun tumah pawh hian Mizo Hmeichhia ten tuk tina Buh an den thin a tawp nana BUH HER KHAWL lo chhuah tan tirh leh ka lak chhuak ve dan te ka’n sawi teh ang.
Mizoram UT kan han nih chhoh tirha Industries Department-in Buh her khawl Thingtlang lama Subsidy-a an pek chhuah kha Mamit-a Bun turin ka dawng ve hlauh mai a. Hetih hun lai hian Rambuai karah Thlawhhma lak a mumal deuh tawh a. Hawp khawp thar pawh kan tam viau tawh a ni. Mamit-ah hian Buh her khawl te deuh pahnih Pu Dingliana Hmunsam vengah leh Pu Vuka’n Charkawnah an bun a, Kan la indaih lo khawp mai. Kan Buh her khawl dawn hi SWAN COMPANY siam lian zet mai Feet 4 dawn a sei a Bawkkhup chi, Chhawhchhi hriak herna tur nen Set khat a siam a ni a. Quintal sawm chuang zet a rit a ni. Khawthlang lam tan a tangkai dawn em a tiin phur zetin Aizawl a thlen veleh Mamit a bun turin kan han la a ni.
MAMIT KAN PANPUI :
Mamit-ah Motor a la thleng si lo, Tuipuibari kawng BRTF-in an laih mek chu Tut Dapchhuah an kai phei chauh a la ni a, Tut thlengin ruah a sur lohin Motor a kal thei chauh a, chu pawh chu, kar khat ni tin khua a that zawn loh chuan a kal thei lo. Aizawl atangin TMB (motor) lianin Rawpuichhip kan phur thleng a, Rawpuichhip hi BRTF hmunpui a ni a, an hotute hnenah Tut thlenga min phurhsak turin ka va sawi chu, Khaw that nghak rih turin Supply Godown-ah kan Load thla a. Kar khat zet hnuah chuan Tut kamah min phurh thlaksak a, a lawmawm khawp mai. Tut atang hian Motina ho te Maji Buhfai thiar haw lam Lawng pahnihah Phaizau kai panin kan phur thla leh ta. Kan nau Hauliana nen kan pahnih mai han khawih chet zawh rual ni hek suh. Pioneer hotute puihnain kan ti thei zel a, Phaizau kai kan thlen. Phaizau Pa ho leh Tlangvalte sawmin Lawng atangin kan zawn chhuak ta a.
MAMIT AH ZAWN LUH A NI : Mamit-ah hian Motor la lut hek lo, Buh her khawl lei tawh chuan, Thenrual tha sawmin Tut kai atang hian an zawn thleng chho ta mai thin a, kan khawl hi a Wheel pakhat pawh Quintal khat zeta rit a ni a, a parts thlawn theih kan thlawn vek chung pawhin Quintal sawm dawn a la ni a. |henrual tha leh Office thawhpui te bakah In tinah lutin min zawnpui turin ka sawm a, Bawng chal ka talh a mi 200 zetin Mamit Km 6 zeta thui kan zawn chho ta. Kawng chanve dawnah a zawnnain a dawl ta lo, Thlanvawng feet 20 dawna sei pahnihin kan thlak a. Kawng a te si, kawng kualah kan buai, Saitlan thlen hma kawng kawi chho te chu, a hma kaihna hruizen lian taka kai chho in, kan zawn kal ngil chho ta zel a. In lam atangin thingpui leh chhangte nen min lo hmuak a, kawng laiah ngil taka zawn chho zelin zan dar 10-ah Charkawn kan zawn thleng chu kan lawmin kan hlim kher mai, tumah inhaw san lovin, haw haw dur dur tham zuk awm a.
Mamit kan thleng, ril a tam tawh hlawm bawk a, Charkawn khurpui kawnga kan Inah chaw eia kan kal tur chu a duh tan thingpui sa leh a dai in tur an lo buatsaih a, A dai lam kan kawmchhak Pu Laltheuva te in lama kal chu No khat chauh hmangin, tlak nghal pawp turin an lo thlit zel a, kham lo deuh tan pawh, thlit belh lovin – chawei turin an liam zel a, tumah inhriat hran theih ni tawh hek suh, Upa leh KTP hruaitu thlengin tlak lo a kir leh ngawt chu an awm awm lo ve. Riltam hmanhmawh tawh nen kan hlim phian zawk.
Hemi hnu lawk hian Mamit-in Khawthlang Presbyterian Khawmpui kan thleng a, Khawmpui palai lokal leh Khualzin veivak reng reng chuan, kan Khawl lian zawn chhohna Sulhnu an hmu chu, mak tiin ha hipin an rawn sawi hlawm a. A ropui thawkhatin sawi tham a tling reng a. Kawng chho kan tan ngil nasa a ni. A tuk Office kan han kal pawh chu chawhma lam Office titi zuk tling a, tam tak chuan a hmakaia tang zingah tel in, mawngberh phunga an tan leh an tawlh thluk nasat thu te, Pu Theua ho Pu Zauva compounder te thlengin Koki pilh phung khawpin an tang hlawm a ni.
Hmunsam tlang tuna Pu Sawma in hmuna kan awm laiin kawt zawlah Sethlam a sakah kan bun a, kum khat dawn tluang takin Chhawhchhi (Hriak) te pawh kan her a, mahse rei kan hmang zui thei ta lo. Aizawl lam atangin Mechanic siniar tak tak te pawh lokalin an han siam thin na in, a tha rei thei lo. Kan lak ang midang la vete pawhin rei an hmang bik lo. Hetiang khawl Supply tute hian, khawl hlui, rawng hnawih thar a, a thar anga Supply ni te hian zuk sawi ta mai mai a. Tun hun kalphung thar Sawrkhar thara Transformer that loh avanga Current kan nei mumal loh lutuk chhan an sawi te pawh min ngaihtuah zui tir alawm le!!! Tak tak ni maw.
SIPAI LEH MIKHUAL IN MAK AN TI :
Kan Khawl kan han bun fel, Buh her pah a Chawhchhi kan han her mup mup mai chu a hlimawm ang reng a, a rawn thlirtu apui lah an tam, Vai Sipai vei vel leh mikhual rawn thlirtu te erawh chuan engtin nge hetiang Khawl rit leh Hnawksak tak hi Mamit in thlenpui theih tih zawhna kan dawng deuh reng mai. Helicopter atanga phurh ni tura ngai an tam phian a ni, tun ang hun atan erawh chuan thil danglam leh mak a ni hauh lo ang le. Kan Khawl part Wheel te leh a part thenkhat te hi chu tunah Mamit-ah pawh hmuh theihin a la awm.