Tunhnai ruahsur avanga leiminin kawngpui a hnawhna – Mamit leh a chhehvel inkalpawhna chu Mamit District Disaster Management Authority chairman, bawrhsap Jacob Lalawmpuia chuan Thawhtanni khan a hmunah a tlawh.
Kumin fur ruahtui a tam avangin Mamit district chhung inkalpawhna hrang hrangah lirthei veivak leh mipuiin harsatna an tawk nasa hle tih DDMA chairman hian a sawi a. Chhiatna nasa zawk a thlen lohna’n a theih ang anga invenna lam kalpui tum a ni tih a sawi.
Mamit leh Darlak inkar kawnga leimin avanga harsatna tawh mek chu PWD thuneituten theih ang anga an then mek thu leh leimin avanga inkalpawhna kawngpui min tel mai thei dinhmuna a din avangin kawnghlui, Mausen Road lam chu engemaw thut a awm pawha kal theih/ zawh tlak tura thenfai a ni dawn tih a sawi a. Mamit leh Dapchhuah inkar kawng fur ruahtui vanga kawng chhe thin chu hmalak zel dan ngaihtuah a nih tur thu a sawi bawk.
Darlak leh Tuidam inkar kawng pawh a theih ang anga thuamthat a ni chungin, awmzia a nei hleithei rih loa, tun dinhmunah kawng thar zawka leimin paih faia lirthei kal theiha ruahman mek a ni tih bawrhsap hian a sawi a ni.
Mamit leh Darlak inkar Tuidai thlang leiminin kawngpui a ti khi nasa a, kawng khi hi a theih anga cement hmanga char niin, leiminin kawng a hnawh chu thenfai nghal a ni. Helai kawng leimin hian kawngpui bula Rodingluaia thlam leh vawk in a min pui tel a, silpaulin thahnem tak zar nghal a ni.
Mamit kawnga leimin enfiah
