Tunlaiin Mizoram leh thenawm state-ah vawk natna hri (African Swine Fever) leng mek chuan ziaawm lam a pan loh avangin he hri laka Mamit district mipui ranvulh an him theih nan additional district magistrate chuan Section 144 Cr.PC 1973-in thuneihna a pek angin 2024 April 23 thupek a tichhuak.
Thupekah chuan, Mamit district chhungah ramdang (foreign countries) leh state dang atanga vawk leh vawksa rep leh vawksa atanga siam lakluh khap a ni a. ASF infected area / district danga ASF lenna atangin vawk, vawksa leh a rep atanga siam ei tur Mamit district chhunga lakluh khap a ni tih a sawi.
Ran damlo leh hrisel lo ei tur atana hralh leh zawrh khap a ni a. Vawk thi reng reng chinai thi/ bleaching powder nen thuk taka phum tur a ni a, khamah leh ramhnuaiah paih mai mai tur a ni lo. Vawk thi a awmin a neituten AH & Vety department Mamit hriattir thuai turin a ti.
Thupek bawhchhetute chu Section 188 IPC hmangin hrem theih an ni a. Thupek hi hnuhlet a nih loh chuan chhuah a nih atanga thla hnih chhung a huam a ni.
Mamitah vawk lakluh khap
![](https://theaizawlpost.org/wp-content/uploads/tap_logo-min-large.jpg)