Pathianni zana English Premier League khelhah champion lai leh hmahruai mektu ni bawk Manchester City chuan Goodison Park-a an khingpui Everton chu si thum faiin an sawp a. Nuamsa taka hnehna an chan laiin an elpui lian ber Arsenal chu Brighton lakah si thum faiin an lo tlawm ve bawk si a. City hian champion nawn leh turin khelh hmabak pali an la neihah vawikhat chak chiah mamawh tawhin, champion an hnaih ta hle. Season kal meka chetha tluang tak Arsenal chu season tawp hun pawimawh lamah an zuih a, ‘Next Season’ bawk an thlir a ngai leh dawn ta nge nge niin a lang.
City an chak nuamsa
Khelh khata khel tlem chunga hmahruaitu ni mek Manchester City hian Goodison Park-ah Table hnuai lama awm Everton an hmachhawn a. Mimuala inlan mah nise tha taka khelin, nuamsa pangngai takin hnehna an chang. Everton laka goal thum zet an thun hi minute 51 chhung leka an thun a ni nghe nghe.
City tan hian captain Ilkay Gundogan chuan minute 37-naah Riyad Mahrez siamsak chu chep tak kar atangin awlsam ang reng takin a thai goal a, hmahruaina goal a thun. Gundogan goal thun hian City a fuih phur leh zual a, goal pawh an thun belh leh thuai. City tana goal hnihna thuntu hi ‘amah bawk’ Haaland a ni. EPL-ah season khata goal thun hnem ber record thar siam tawhtu Erling Braut Haaland hian minute 39-naah Gundogan ball vawrh luh tha tak chu Everton si nghak Jordan Pickford rin loh lamah a tauh goal a, an goal hnihna a thun. Haaland hian EPL ah goal 36 a thun tling ta chiah a, City tan inelna hrang hrangah goal 52 a thun tling tawh bawk.
Chawlhlawk hnu lamah City an khel tha chhunzawm a, goal an thun leh thuai. Minute 51-na lekah Ilkay Gundogan chuan fing leh fuh zetin free-kick a chhuih goal a, an goal hnihna a thun. Darkar khat em pawh tling loah si thum fai ngawta hma an hruai hman vangin chak tur zawk a chiang tawk viau a ngaih a ni a. City hian an hmahruaina tizau turin point thum an hmu ngei dawn niin a ngaih theih tawh.
An mualah si thum fai ngawta hnufual tawh Toffees hian an si phurh sut tumin hun tawp dawnah tan an khawh chiam a, tauh goal theihna hun tha vawi hnih an neih chu uiawm takin an hlah a. Michael Keane a tauh hlauhawm zet mai chu City si nghak Ederson chuan pui takin a lo dansak. Hun tawp thlengin goal dang a luh belh thei tawh lova, City chuan champion nawn leh thei turin point thum hlu tak an hmu ta a ni.
An tualzawkah ngei an tlawm vangin Everton dinhmun a chhe leh zual a. Khelh 36 atanga point 32 hmuin 17-naah an awm mek a. A him chin luah mek mah se table hnuai ber dawttua a awm mek Leicester City aia khel tam chungin point khat lekin an sang zawk mek a. Harsa lo taka lehpelh theih reng an la ni. Heti a nih vang hian him turin an beih zui fe a ngai ang.
Engtikah nge City an champion ang?
Everton an hneh laia Brighton lakah Arsenal an lo tlawm si vangin City hian champion an hnaih leh zual a, champion turin vawi khat chak chiah an mamawh tawh. Inrinni zan khian pahnihnaah awm mek Arsenal hian Nottingham Forrest an hmachhawn dawn a. Nottingham lakah Gunners an tlawm a nih chuan khelh hah ngai lovin Pep Guardiola team an champion nghal ang. Arsenal in Nottingham Forrest an hneh a nih pawhin City hian pathianni zana an khingpui Chelsea an hneh a nih chuan dan rual lohin an champion zui nghal dawn tho thung. Champion turin City tan ngah rei a ngai tawh lo.
“Next season” bawk maw?
Rin phak baka season bul tan tha a, rin phak bak veka tlo Arsenal hian champion theih na hun tha tak an nei hman hial a. Champion tura inelna boruak a len tak tak meuh chuan a ruh a lo la no deuh tih a lang a, champion turin ‘Next season’ bawk an thlir leh nge nge a ngai dawn ta niin a lang.
Arsenal hian Emirates Stadium-a Brighton & Hove Albion an mi-khual hmain an chunga awm Manchester City an chak tih an hre hman a. An elpui lian ber an chak vangin Gunners hian champion beisei chhun-zawm turin an mualah chak ngei ngei an mamawh. Chak an mamawh em em laiin si thum fai ngawtin an tlawm ta si a, an champion zo dawn lo leh ta nge nge niin a ngaih theih chian ta.
Emirates Stadium-a inkhel hmuhnawm takah chawlhlawk hmain goal lut a awm thei lo zet a. Chawlhlawk hnu lamah beisei phak baka thain mikhual team Brighton an inlan ta thung. Brighton tan hian minute 51-naah Julio Enciso chuan Estupiñán siamsak chu hnai tak atangin a tauh goal a, hmahruaina goal a thun. Chak mamawh tak chunga goal an chhuah vangin Arsenal an hawi hai hle.
Arsenal hian an si phurh sut ngei tumin tan an khawh a, inkhel a hmuhnawm leh zual hle. Goal an thun an mamawh em em laiin Arsenal hi an chesual a, ho takin goal an chhuah belh. Arsenal tihsual nangchintu Deniz Undav chuan minute 86-naah si nghak Aaron Ramsdale pet khumin an goal hnihna a thun. Hun tawp dawn ruaiah goal an chhuah belh vangin Gunners tan a beidawnthlak tawh viau. Si hnih thun tawh mahse Brighton in an duhtawk mai lo. Hun tawp dawn tep minute 90+6 ah Pervis Estupiñán chuan chiang zetin goal kilah a pet lut a, an goal thumna a thun a, team lian lakah si thum fai ngawtin an chak zui ta a ni.
Arsenal lakah point thum hlu tak an hmuh hmangin Brighton hi paruknaah an inhlangkai a. Europa League khelh phak ngei tumin tan an khawh zui leh ang.
Manchester City in champion an hnaih
