March 18, Inrinni zan khan FA Cup quarter-final khelh khelh a ni a. Champion tura rinkai Manchester City chuan Etihad Stadium a an mikhual Burnley chu 7-0 ngawtin an sawp a, semi-final an lut. Burnley an sawp tum hian City forward Erling Haaland chuan hattrick a siam a, Haaland hian English record thar siam a hnaih zel.
Manchester City hian Etihad Stadium-a an mikhual Championship hmahruaitu Burnley lakah bul an tan tha a. Ball chang tam zawk an nih bakah goal thun theihna hun tha pawh an nei tam zawk. Inkhel thunun tak chungin goal thun nan darkar chanve chuan an nghah tlin a ngai thung. Beisei anga goal a luh lawk theih loh hnuin Erling Braut Haaland chuan minute 32-naah Alvarez siamsak atangin hmahruaina goal a thun. Goal thun dawklak Haaland hian hmahruaina goal a thun hnu lawkah goal a thun leh thuai. RB Leipzig lakah goal nga ngawt thun hlim-hlawl Haaland hian minute 35-naah Phil Foden siamsak atangin an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Ciry an khel tha zui zel a, an captain hlui Vincent Kompany enkawl Burnley lakah that an chhuah duh lo. Minute 59-naah goal thum thun tawh Haaland chuan Phil Foden-a’n goal post a pet per, per let leh chu chiang zetin a pet goal a, hattrick a siam. Tarlan tawh angin Haaland hian nilai zan khan RB Leipzig lakah goal nga ngawt a thun a. Burnley lakah hattrick a siam zui leh a, ni thum chhungin goal riat ngawt a thun hman. City goal thun khawl Haaland hian season kal mekah City tan inelna hrang hrangah goal 42 a thun tling ta chiah a. English Premier League tia hming thlak a nih hnu lamah EPL player zinga goal thun hnem ber record siam turin goal hnih chiah a mamawh tawh a. Season khatah amah aia goal thun hnem pahnihte hi season khata inelna hrang hrangah goal 44 thun tling Ruud van Nistelrooy leh Mohamed Salah te an ni. Haaland hian season kal mekah EPL record pakhat, City club record pahnih leh Champions League record pahnih a lo siam tawh bawk a. English record thar siam ngei tura ngaih a ni a, EPL record thar siam thei dinhmunah a ding mek bawk.
Haaland goal thum thun hnu hian City an khel tha chhunzawm a, goal thun belh ngei tumin an mikhualte na takin an nawr chhunzawm zel. Minute 62-naah Julian Alvarez chuan Kevin de Bruyne siamsak atangin City goal lina a thun a. Minute 68-naah bench atanga lut Cole Palmer chuan an City goal rukna a thun leh zet a. Minute 73-naah Alavarez chuan an goal sarihna thunin a tawp a khar a, an mualah 7-0 ngawta hnehna changin, semi-final an lut zui ta a ni.
Manchester City captain ropui, City tan-tute pawhin an ngainat em em Vincent Kom-pany chu a ropuina mual Etihad Stadium-ah Bur-nley kaihruaiin a let leh a. Etihad Stadium-a let leh hmasak ber tumah a team hlui City chuan 7-0 ngawtin an lo sawp ta thung.
Burnley tan Etihad Stadium-a chak loh hi thil thar a ni hauh lo thung a, an tawn thin pangngai ve reng a tih theih hial tawh. Etihad Stadium-a an chak hnuhnun ber tum chu kum 1963 daih tawh khan a ni a. Hemi hnu hian Manchester City khelmualah chak an la nei leh ta miah lo. FA Cup atangin tla bawk mah se Premier league-a kai-sang turin an dinhmun a tha viau tawh a. EPL a kaisan tumin an insawr-bing zui tawh ang.
Manchester City in semi-final an lut
