Pathianni zana inkhel ngaihven hlawh takah Manchester City leh an mikhual Arsenal te chu goal awm lovin an inhnehtawk. Etihad Stadium-ah chak zawk an awm theih loh vangin Arsenal in an hmahruaina an hloh a. City in pathumna luah chhunzawm mah se champion an tumnaah kawng harsa zawk an zawh a ngaih phah dawn thung.
Etihad Stadium-ah City leh Arsenal an inhmachhawn hmain Liverpool chuan an mualah Brighton an hneh a, EPL hmahruaitu thar an ni hman. Liverpool chak hian Arsenal leh City te hi pressure na zawk a pe a, football ngainatuten he match hi an ngaihven phah lehzual sauh bawk. Inkhel hmuhnawm takah Arsenal in champion lai City an dang tluan a, tlawm an pumpelh.
Champion lai City hi Arsenal lakah hnehna chang tura rinkai an ni a, an chak a nih chuan champion theihna hun tha zual zawk an nei thei dawn bawk. An mualah chak ngei tumin an inlan a, khelh pawh an khel tha viau nghe nghe. Ball chang tam zawk ni ngar ngar mah se Gunners tlarhnung inrem phui tak an thiat hlei thei lo va, William Saliba leh Gabriel te inkawp fuh zet chuan Erling Haaland leh Phil Foden an thukru tluan zak. City tlarhnung pawhin Arsenal player pawimawh Bakuyo Saka an thukru tluan ve zak bawk.
EPL-ah a zawna vawi li champion nih tuma hma lam pan mek City hian Arsenal lakah ball chang tam tluan zak mah se an thlamuang thei bik lo. Arsenal nawr let a hlauhawm reng a. Gabriel Jesesus a team hlui laka goal thun theihna hun tha a hloh a. Trossard pawhin a hma a sial hlek vangin Arsenal in goal an thun theih loh phah bawk. Hun tawp thlengin goal dang a luh belh thei lova, team lian pahnihte chu goal awm lovin an inhnehtawk zui ta a ni.
City hian an mualah khelh 57 chhung goal an thun zawn tawh a, an mualah goal an thun zawn hi Arsenal in an tihtawp sak ta a ni.
Manchester City leh Arsenal an inhnehtawk
![](https://theaizawlpost.org/wp-content/uploads/Clipboard01-469.jpg)