Manipur-a silai puakah hmeichhia kum 19 mi hliam

Manipur-a silai puakah hmeichhia kum 19 mi hliam
Ukhrul, Manipur-a buh hmuna hna thawk lai hmeichhe kum 19 mi chu hel pawl pahnih inkahnaah kah hliam a ni tih police-in an sawi a, inkahna hi chawhnu dar 01:00 vel atanga thim hlim, dar 06.50 vel thleng a awh niin an sawi bawk.
Police chuan he thil hi Mongkot Chepu khuaah Kuki-Zo village volunteer nia rinhlelh pawl hnih leh Tangkhul Naga village volunteer-te inkarah a thleng niin an sawi.
Litan-a police officer pakhat chuan Hindustan Times hnenah, “Inkah hi hnam hniha volunteer-te inkarah a thleng nia sawi a ni a, automatic assault rifle ri pawh kan hria a; mahse, tuin nge hmang tih kan hre thei lo va. Litan Police Station-a awm rescue team (BSF mite) kan tir a, hmeichhe kum 19 mi tih loh chu thi leh hliam report kan la nei lo,” a ti.
Kuki CSO Working Committee, Ukhrul (Kuki pawl) chuan Thawhtanni vek khan thuchhuah siam nghalin thil thleng hi an dem thu an sawi a, khaw mipuite chhanchhuak thuai turin an ngen.
Thuchhuahah hian Tangkhul silai keng volunteer-ten Mongkot Chepu-a chengte an bei niin an puh a. Hmeichhiate hi Lengthei Mol lo, chenna in atanga metre 500-600 vela hlaa thlai chinna hmuna thawk an ni a, thliar miah lo leh tum lawkin kah niin an sawi bawk.
Police-te chuan khaw mite hi venhim hna thawktuten him taka an lak chhuah hlawm thu an sawi.
Kuki pawl chuan silai hmehpuah mek chu tikhawtlai lova titawpa khaw chhunga tangkhang zawng zawngte him taka chhanchhuah a nih theih nan sorkar leh venhim hna thawktute rang tak leh thutlukna siama inrawlh an phut a; civil mi thihna thleng venna turin Ukhrul highway leh a chhehvel venhima Shikibung, S.Laho, leh Sinakeithel te pawh telin hmun hriat larah hmanhmawh leh uluk taka a titu zawn beihpui thlak turin an phut a. Firfiak thila mawhphurtu ralthuam keng zawng zawngte chu ralthuam chhuhsak vek turin an phut.
Hmun dangah Manipur Chief Minister Yumnam Khemchand Singh leh KZC member-te an thutkhawm duh loh avangin mipui thinrimin Kuki-Zo Council (KZC) chairman chenna in chu an bei bawk.
Khemchand Singh leh KZC member-te hi Inrinni khan Assam-a Guwahati-ah Manipur-a remna a awm theih dan tur sawihovin an thukhawm a. Kuki-Zo pawl thenkhat chuan ‘inawpna hran’ an phut tihhlawhtlin a nih hma chuan Manipur sorkar nena inbiak hi an duh lo a ni.