Venhim hna thawktuten chi leh chi inkara buaina chhuahna, Manipur-a hmun hniha beihpui an thlaknaah M-16 automatic assault rifle telin ralthuam leh inbiakpawhna hmanrua thahnem tak an hai chhuak.
May 3, 2023-a chi leh chi inkara buaina a chhuah atang khan mipuiin thuneitute kut atangin ralthuam 6,000 chuang an ru tawh a. Tharum thawhna thlengah hian mi 260 chuang thiin mi 60,000 chuang in leh chhuahsana tlanchhia an awm phah.
Manipur Police chuan Nilaini khan Imphal East-a dap chhuah beihpui an thlaknaah 9 mm SMG carbine leh a magazine, 12-bore single-barreled gun, 12-bore double-barreled gun, tualchher barrel gun, 9 mm pistol pahnih leh a magazine, .45 pistol leh a magazine, .32 pistol leh a magazine leh 9 mm mu pahnih an hai chhuak.
Imphal West-ah pawh venhim hna thawktute hian hemi ni vek hian tlang bulthut, Chambirok-ah ralthuam leh puak thei thahnem tak an man bawk a. Police officer pakhat chuan a chhehvelah pawh dap chhuah beihpui an thlak zui a, hand grenade panga assault rifle telin ralthuam tan tak an hai chhuak tih a sawi.
Manipur Police chuan vantlang chu an ralthuam leh puak thei ruk chhuahte thuneitute hnenah kir leh turin an ngen a. Venhim hna thawktute puia boruak duhawm lo siam zawnga awm lo tur leh thil thleng leh mihring rinhlelhawm an hmuh leh hriat pawh an hnaih ber police station-a thlen zel turin an ngen.
Manipur-ah ralthuam tam tak hai chhuak
