Manipur Assembly August 29-ah thu dawn

Chief Minister N. Biren Singh kaihhruai Manipur Cabinet chuan Assembly monsoon session chu August 29 a neih turin an ti.
Chief Minister’s Office chuan social media platform X hmanga puanchhuahna neiin thultukna chu August 21-ah Cabinet-in a siam tiin a sawi bawk a.
Tun hi Manipur Cabinet tena July thla tawp hnua session chungchanga thutlukna an siam tum thumna a ni a. Monsoon Session hi neih a nih chuan 12th Manipur Legislative Assembly-ah tum li neihna tur a ni.
Member 60 awmna Manipur Assembly chuan Thawhtanni khan ethnic violence awm mek chungchang sawihona neiha special session neih a tum chu State Cabinet-in rawtna a siam chungin Raj Bhavan-in thutlukna a siam duh loh avangin a hlawhchham tawh a ni.
August 21 khan Congress leader Jairam Ramesh chuan Manipur sorkar chuan Governor Anusuiya Uikey chu July 29 khan August chawlhkar thumnaa Assembly special session koh turin an lo ngen tawh a ti a.
Manipur sorkar chuan August 4 ah ngenna a siam nawn leh a, chutah chuan August 21 ah ko turin a ti a. Mahse, Raj Bhavan chuan special session chungchangah notification engmah tihchhuah a nei duh rih lo a ni.
Governor office chuan a tlangpuiin Assembly session neih hma ni 15 velah hriattirna a tichhuak tlangpui thin a. “Tun tumah chuan Raj Bhavan in hriattirna a tihchhuah kan beisei” tiin senior official chuan a sawi.
Dan ang chuan Assembly chu kum khatah tum hnih tal session nei tur a ni a. Manipur House session neih hnuhnun ber chu March thla tawh khan niin September 2 chu an neih leh hman ngei hun tur a ni bawk.
Session hi neih pawh ni se ‘security’ thil avangin rorel lai BJP-a tel Kuki MLA 10 te chu an tel rin a ni chuang lo bawk.
Kuki leh Meitei community te May 3 atanga intihbuaina avangin mi 160 velin nunna chan tawhin in leh lo chhuahsan leh chan mi 60,000 chuang an awm tawh bawk.