Manipur atanga raltlan tlem telh telh

Kum liam ta kum chawhnu lamah Manipur-a Zo
hnahthlak mi sing chuan Mizoramah an raltlan a, mahse kum tawp lam atang khan an pung lo mai ni lovin, an tlem telh telh.
Thu dawn danin, tun hnaiah an ralmuang deuh a, hei vang hian an tlanchhuak tawh lo. Tlanchhuak thar an awm loh bakah Mizorama tlanchhiate zinga mi engemaw zat chu mahni khuaah an kir leh.
Home department chhinchhiah danin, nikum October ni 26 khan Manipur atanga raltlan hi Mizoramah mi 11911 an awm a, hemi hnu hian an pung ta lo. December ni 15-ah mi 11348 an ni a, December ni 19-ah mi 9653 an ni.
Kum a lo thar a, home department-in Manipur atanga tlanchhia Mizorama awm zat an en lehin, a hma aiin pakhatin an lo tlem a, an chhinchhiahna thar ber, January ni 8-a mi-ah mi 9652 an ni.
An chhinchhiah danin, raltlante zinga mi 1465 chu relief camp-ah an awm a, hmun dangah mi 8187 an awm.
Relief camp hi Aizawl, Kolasib leh Saitual district-ahte a a awm a, camp hi 28 a awm. Relief camp pawna awmte hi Hnahthial district tih loh district dang zawngah an awm a, a tam ber chu Aizawl district-ah niin, mi 3694 an awm. Mi 31 awmna Siaha district-ah an tlem ber.
May ni 3-ah khan Manipur-ah Zo hnahthlakte leh Meitei an intibuai a, hemi hnu hian ralthuam hmangin an inbei zui a, hei vang hian mi sing chuang Mizoramah an raltlan a ni.
Manipur-a Zo hnahthlakte leh Meitei-te hi tih tak zeta indo an ni a, mahse tun hnaiah a hma anga inkah bur bur a awm ta lo. An boruak a ralmuang ta deuh a, hmun danga tlanchhiate pawh mahni khuaah an let leh nual a ni.