Manipur buaina chinfel dan dap
turin Mizoram MP-in centre phut
Parliament Winter Session neih mekah Mizoram Lok Sabha MP Richard Vanlalhmangaiha chuan Manipur buainaah sawrkar laipui chu remna palaia tang a, community pahnihte dawhkan khat kilpuia an harsatna chinfel dan sawipui turin a phut tih a sawi.
Lok Sabha MP hian thusawina hun changin, sawrkarin laipuiin Myanmar, Bangladesh leh Manipur buaina avanga Mizorama Zohnahthlak raltlante tan chhawmdawlna sum leh pai thahnem tak Mizoram sawrkar hnena a pek avangin lawmthu a sawi a. Chutih rualin Manipur buaina hian a awh rei ta hle a, mi 200 chuangin nunna chan tawhin, mi 50000 chuangin in leh lo an chan tawh bakah Kristiante biak in 300 chuang hal a ni tawh a, sawrkar laipui tan mahni ram chhung ngeia buaina thleng hi a chinfel dan ngaihtuah a hun ta hle tih a sawi.
“Pathianin nunna hlu tak min pek hi kan zah tur a ni a, he buaina chinfel dan kawng tha zawk ngaihtuah thuai a nih loh chuan nunna tam zawk kan chan belh zel dawn niin a lang. Sawrkar laipuiin paramilitary force tam tak tir lut mah se, community pahnih inkara inremna a awm si loh chuan an harsatna hi sutkian tak tak a nih a rinawm chuang loh a, dawhkan khat kilpuia an harsatna sutkian dan zawnpui turin ka phut a ni,” Richard Vanlalhmangaiha hian a ti.
Manipur buaina chinfel dan dap turin Mizoram MP-in centre phut
