Manipur-ah buaina thar a chhuah leh hnuah boruak tang tak awm chungin tharumthawhna a chhuah belh zui lo thung a, May 3-a buaina chhuah atangin boruak tang takin a la uap zui reng a ni.
May 23 thleng khan sumdawnna hmun te kharin a la awm vek a, security personnel te chuan pawn chhuak lo turin vantlang aurinna hmangin New Chekon area, Imphal East district chu an vil reng a, he lai hmun hi silai keng tena in pahnih May 22-a an halna hmun a ni.
“Tualchhung mite chuan silai an neih leh hmanrua awm ang ang te hmanga inralringin Pukhao leh Leitanpokpi, Imphal East district-ah te chuan bunker hmun nga vel laia an siam chu security forces ten an tihchhiatsak,” tiin Police te chuan an sawi a.
Valley district-ah sit-in demonstration neih niin hmeichhiate an ni tlangpui thung a, heng mite hian Kuki militant te laka Suspension of Operation (SoS) kalpui tihtawp an ngiat a ni. Hei mai bakah hian Myanmarese immigrants te poppy hill district a chingtute thawn haw leh tihtawp bakah Hill area MLA tena State thenhran an ngiat chu an duh lohna an lantir bawk.
Curfew thlahdul hun pawh darkar hniha tihtawi niin zing lam dar 5 atanga tlai lam dar 2 thleng chauh huam tir a nih tawh thu Chief Minister N. Biren Singh chuan a sawi a, hei bakah hian mipuite chu chenna in inhalsak kalpui tawh lo turin a ngen bawk.
Biren Singh chuan New Chekon ah mi pathum man an nih thu sawiin an zinga pakhat chu ex-MLA a nih thu a sawi a, midang pathum an tlanchhuah hman thu a sawi bawk.
“Dan kalha chete lakah dan hmangin hma kan la dawn a. Hei bakah hian Central forces company 20 dang chah luh kan tum bawk,” tiin CM Biren Singh chuan a sawi bawk a.
Manipur-ah hian Army leh Assam Rifles 10,000 vel an awm mek a, heng sipaite hian aerial surveillance te unmanned aerial vehicle leh Cheetah helicopter hmangin patrol an nei a ni.
CM chuan state chhung leh pawna social media hmanga inhuatna lam thehdarhtute lakah hremna lekkawh a nih theih nan hma an lak tur thu a sawi bawk a.
Internet service chu la tihtawp zui zel niin hei hi inhuatna lam message tihtawp a nih theih nana hmalakna a ni a. Mahse, chutih lai chuan Meitei leh Kuki community te State pawna chengte chuan social media post hmangin inhuatna lam an kalpui reng tia sawi a ni bawk.
“Hun ralmuangah remna leh muanna a awm theih nan thuhova thil ngaihtuahho a ngai a ni,” tiin Chief Minister chuan a sawi.
Manipur buaina hi May 3-a Meitei community tena Scheduled Tribe (ST) status an ngiat duh lova ‘Tribal Solidarity March’ neih atanga intan a ni a.
Manipur buaina hi a hmain Kuki khua te reserve forest ram atanga nawrchhuah atanga inmung tawh niin a hma pawhin lungawilohna tenau hrang hrang a lo kalpui sa tawh a ni bawk.
Manipur-ah hian Meitei 53% vel awmin Imphal Valley-ah an cheng ber a. Tribals-Nagas leh Kukis te chuan 40% vel hauhin hill district-ah an cheng thung.
Oficials te chuan tun buaina chhuak avang hian mi 70 velin nunna an chan tawh tiin an sawi a. Army leh para-military personnel 10,000 vel tirh luh tawh an ni bawk.
Manipur buaina-in ziaawm lam pan lo
![](https://theaizawlpost.org/wp-content/uploads/tap_logo-min-large.jpg)