Manipur Police mi atangin Kolasib-ah heroin mansak
Excise & Narcotics Department chuan Manipur lam mi pahnih hnen atangin heroin tam tham tak an man a, pakhat hi Manipur Police mi a ni.
April 1 chawhnu dar 2.00 khan Excise & Narcotics Department hian Kolasib Khuangpuilamah heroin kg 1 leh gram 252 (hawng 100) leh a neitu nia puh mi pahnih – Patrick Ramhmingthang (44) Mualvaiphei Manipur leh Samson Lalremruat (24) Parbung Manipur nia inchhal an man a. Heroin phurhna atana an hman lirthei Mahindra Scorpio MZ-02 6979 pawh hren a ni. Heroin hi Manipur atanga an lak, Silchar lama hralh an tum niin an sawi.
An pahnih lakah hian ND&PS Act 1985 hmangin thubuai siamsak an ni a. Patrick Ramhmingthang hi Manipur Police thawk mek lai a ni. Court-ah thiamloh an chang a nih chuan kum 10-20 inkar jail tan theihna leh sumfai cheng nuai 1-2 inkar thleng chawi bawka hrem theih an ni.
April 1 vek khan chawhnu dar 12.30 vekah Khawzawl Police Station Special Team chuan Tuisenphai Check Gate Champhai Tlangsamah naupang kum tling lo pakhat hnen atangin heroin gram 23 (hawng 2) a rit an man a. ND&PS Act ziahluh niin dan bawhchhetu hi kumtling lo a nih angin Juvenile Justice Board Khawzawl principal magistrate kuta hlan a ni.
Khawzawl PS Special Team vek hian March 31 zan dar 11.00 khan lirthei pakhat Hyundai Venue MZ-01 AD 4230 chu Tuisenphai Check Gate-ah check-in he lirthei atang hian foreign cigarettes (Esse Light) bawm 20 an man a. An thil man hi Legal Metrology Champhai asst controller hnenah dan anga hma lak chhunzawm turin an hlan.
Manipur Police mi atangin Kolasib-ah heroin mansak
