Kar hmasa Ningani atanga neih Parliament Monsoon Session chu Manipur buaina avangin rorel hlei thei loin a awm mek a. Rorel tan a nih phat atangin Lok Sabha leh Rajya Sabha-ah chuan opposition ten Manipur buaina chungchang tlang taka sawiho an rawt nghal a, house pahnihten rorel mumal thei loin hemi ni atan rorel inkhawm tihtawp ve ve hial a ni.
Lok Sabha 17-na thutkhawm vawi 12-naah hian opposition party te chuan tan an la nasa hle a, kum 2024 Lok Sabha inthlan lo awm turah BJP kaihhruai National Democratic Alliance (NDA) te chu hneh an nih ngei theih nan party 26 te chu tangrualin Indian National Developmental, Inclusive Alliance (INDIA) tih an din a. Tun tum parliament session-ah hian sorkar chuan Bill 31 pass turin a chhawp chhuak a ni.
Nimin thawhtanni chawhma khan Lok Sabha, Speaker Om Birla chuan oppotition te chu house rorel lai tibuai lo tur leh an au hla leh placards te chu house chhunga keng lut lo turin a ngen a, Manipur buaina chungchang chu chhun dar 12-ah zalen taka sawiho a nih tur thu a sawi a ni. Hetih mek lai hian Rajya Sabha-ah pawh opposition ten house ah bengchheng an siam nasa hle a, chhun dar 12 thleng thutkhawm hi tihtawp lailawk a ni ve bawk.
Manipur vangin Monsoon Session buai
